Италиянинг «Монса» клубида ижарада ўйнаётган «Арсенал» ҳимоячиси Пабло Мари пичоқлаб кетилди.
Ушбу воқеа Милан четида жойлашган Ассаго савдо марказида содир бўлган. Руҳий хаста эканлиги тахмин қилинаётган 46 ёшли эркак супермаркет жавонидан пичоқ олиб, мижозларга ҳужум уюштирган, натижада улардан камида икки нафари жиддий жароҳат олган, дея хабар беради Corriere dello Sport.
Ҳужум қилган шахсни савдо маркетига ташриф буюрганлар тўсиб қолди, кўп ўтмай карабинерлар (Италия қуролли кучларининг бир тури) ёрдамга келиб, эркакни ҳибсга олган.
Ҳаммаси бўлиб 6 киши жароҳат олди, улар орасида Мари ҳам бор эди. Улар вертолёт ёрдамида касалхонага етказилган. Либеро Қуотидиано маълумотларига кўра, бир киши, супермаркет кассири шифохонага етказилаётганда вафот этган.
Мари ҳушида ва атрофидагилар билан гаплаша олмоқда. «Монса» бош директори Адриано Галлиани ва мураббий Раффаэле Палладино аллақачон футболчини кўриш учун ташриф буюрган.
Галлиани Марининг ҳаёти хавф остида эмаслигини айтиб ўтди. Футболчи орқа қисмидан чуқур жароҳат олган, бироқ ҳаётий муҳим органлари зарар кўрмаган. Испаниялик футболчининг мушаклари шикастланган ва уларга чок тушган.
Изоҳ (0)