ЕЧЛ плей-офф босқичига чиқа олмаган «Барселона» 20 млн евродан ортиқ даромаддан қуруқ қолди

Чемпионлар Лигаси плей-офф босқичига чиқа олмаган «Барселона»нинг иқтисодий зарарлари маълум бўлди.

Жорий мавсум турнирда каталонияликлар 67,18 миллион евро ишлаб олди, шу жумладан, 34,11 миллион тарихий рейтинги учун берилди. Гуруҳ босқичининг сўнгги турида «Барселона» «Виктория» устидан ғалаба қозонса, 2,7 миллион евро, дуранг натижа учун 900 минг евро олади.

«Кўк-анорранглилар» ЕЧЛнинг чорак финалига қадар етиб боришни мақсад қилган ва буни мавсум бюджетига киритган эди. Гуруҳдан чиққанлик учун 9,6 миллион евро, 1/4 финалга чиқиш 10,6 миллион евро даромад олиб келиши керак эди. Шу тариқа «Барселона» режалаштирганидан 20,2 миллион евро кам оладиган бўлди.

Европа Лигасидаги иштирок учун эса жамоа максимум 14,9 миллион евро даромад қилиши мумкин — турнир ғолиблиги шунча пул келтиради.

2021/22 йилги мавсумда каталонияликлар Чемпионлар Лигаси гуруҳ босқичи ва Европа Лигасининг 1/4 финал босқичидаги юришини тўхтатгани сабабли йўқотишларни 12 миллион еврога баҳолаган эди.

Эслатиб ўтамиз Хави шогирдлари нуфузли мусобақанинг C гуруҳида 4 очко билан 3-ўринни эгаллаб турибди ва плей-офф босқичи йўлланмасидан қуруқ қолди.