Наманган вилояти Мингбулоқ туманида компьютер клубидаги жанжал пичоқбозлик билан якунланди. Бу ҳақда «Бу кун» информацион дастурида хабар қилинди.
Қайд этилишича, Мингбулоқ туманида яшовчи фуқаро (2002 йилда туғилган) тунги соат 01:20 ларда ўзига тегишли бўлган Game Club номли компьютерхонада шу туманда яшовчи таниши билан аввалдан бўлган низоси сабабли ўзаро жанжаллашган. Рақибидан мушт еган компьютерхона эгаси клуб ошхонасида бўлган ош пичоқ билан танишининг қорин қисмига бир маротаба уриб, тан жароҳати етказган.
Оғир жароҳат олган йигит шу ердаги болалар ёрдамида шифохонага олиб кетилган. Компьютерхона эгаси эса жиноят қуролини яширишга уринган.
Мазкур ҳолат юзасидан текширув ҳаракатлари олиб борилиб, ҳодиса содир бўлган жойдан 200 метр узоқликдаги ариқдан пичоқ топилган. Жиноят кодексининг 104-моддаси (қасддан баданга оғир шикаст етказиш) 2-қисми «л» банди билан жиноят иши қўзғатилиб, айбланувчи қамоққа олинган.
Изоҳ (0)