Товламачиликда гумон қилиниши фонида Россияни тарк этган журналист Ксения Собчак Литвага Исроил паспорти билан кирган. Бу ҳақда Литва давлат хавфсизлик департаменти директори Дарюс Яунишкисга таяниб, Meduza хабар берди.
«У ҳозир Литвада. Исроил паспортига эга фуқаро сифатида унга виза керак эмас ва у, янглишмасам, 90 кун давомида шу ерда қолиши мумкин. Ҳа, биз буни тасдиқлаймиз», — деди Яунишкис Зиниу радижас радиостанцияси эфирида. Аввалроқ журналист Литвага Исроил паспорти билан келгани ҳақида чегара хизматидаги Литва ОАВ манбалари норасмий тарзда хабар берган эди.
Яунишкиснинг қайд этишича, Литва разведкасида Собчакнинг мамлакатда экани хавфсизликка таҳдид солиши мумкинлиги ҳақида ҳеч қандай далил йўқ.
Ксения Собчак 26 октябрь куни Россияни тарк этиб, ОАВ хабарларига кўра, Беларусь ҳудуди орқали Литвага кетган. Шу куни Москва вилоятида Собчакнинг уйи тинтув қилинди, аммо у уйда бўлмаган.
Ксения Собчак «Ростех» давлат корпорациясидан товламачиликда гумон қилинмоқда. Ҳуқуқ-тартибот идораларининг маълум қилишича, иш бўйича Собчакнинг тижорий директори Кирилл Суханов ва Татлернинг собиқ бош муҳаррири Ариан Романовский қўлга олинган.
Ксения Собчак Исроил фуқаролигини олгани ҳақида апрель ойида Исроилнинг Haaretz газетаси хабар берган эди. Ўшанда Собчакнинг онаси, сенатор Людмила Нарусова бу ҳақда ҳеч нарса билмаслигини, қизи Исроилга «тиббий ишлар билан» кетганини айтган.
Изоҳ (0)