Бирлашган Миллатлар Ташкилотининг маданият бўйича агентлиги ЮНЕСКО Россиянинг Украинага бостириб кириши оқибатида Украинадаги 207 та маданий обида зарар кўрганини маълум қилди. Бу ҳақда Al Jazeera телеканали хабар бермоқда.
Хусусан, улар — 88 та диний обида, 15 та музей, 76 та тарихий ва/ёки бадиий аҳамиятга эга бинолар, 18 та ёдгорлик ва 10 та кутубхона.
«Биз вазият ёмон деган хулосага келдик. Бундан ҳам ёмонлашиши мумкин», — деди ЮНЕСКОнинг Маданият ва фавқулодда вазиятлар бўйича директори Криста Пиккат Женевада бўлиб ўтган матбуот анжуманида.
Шу билан бирга, унинг қўшимча қилишича, ҳозирча Украина ҳудудида жойлашган еттита жаҳон меросининг бирортасига зарар етмаган.
ЮНЕСКО ўз хулосаларини ЮНОСAT БМТ сунъий йўлдош маркази маълумотларига асосланиб чиқаради.
«Маҳаллий жойлардан олинган ҳисоботларга асосланиб, ЮНЕСКО ЮНОСATга потенциал шикастланган объектлар рўйхатини юборади. Сўнгра агентлик сунъий йўлдош тасвирларини олади кичик мутахассислар гуруҳи эса олдинги ва кейинги фотосуратлар ўртасидаги фарқни текширади», — деб тушунтирди Криста Пиккат.
Унинг қўшимча қилишича, ЮНЕСКО уруш даврида мамлакатдан маданий мерос объектларини экспорт қилиш имкониятини Киев билан муҳокама қилган.
Аввалроқ Украина маданият ва ахборот сиёсати вазири Александр Ткаченко Украинадаги музей реквизитлари ва экспонатларини сақлашда ёрдам сўраб ЮНЕСКОга мурожаат қилишга мажбур бўлганини маълум қилганди.
Изоҳ (0)