20 октябрь куни Халқ депутатлари Бухоро вилояти кенгашининг 66-сессияси бўлиб ўтди. Сессия ишида «Вилоятда йўл ҳаракати хавфсизлигини борасида амалга оширилаётган ишларнинг самарадорлиги тўғрисида»ги масала муҳокама қилиниб, кун тартибидаги масала юзасидан вилоят ИИБ ЙҲХБ бошлиғи Анвар Аҳмедов ахборот берди.
Бунда Ўзбекистон президентининг 2022 йил 4 апрелдаги «Автомобиль йўлларида инсон хавфсизлигини ишончли таъминлаш ва ўлим ҳолатларини кескин камайтириш чора-тадбирлари тўғрисида»ги қарорида белгиланган вазифалар ижросини таъминлаш мақсадида вилоятда йўл ҳаракати хавфсизлигини таъминлаш борасида муайян ишлар амалга оширилаётгани қайд этилган.
Амалга оширилган тадбирлар натижасида жорий йилнинг 9 ойи якуни бўйича содир этилган йўл-транспорт ҳодисалари юзасидан қўзғатилган жиноят ишлари сони ўтган йилнинг шу даврига нисбатан 30 тага ёки 10,6 фоизга камайгани таъкидланган. Олиб борилган ижобий ишларга қарамасдан йўл-транспорт ҳодисалари Жондор (3 тага), Пешку (1 тага), Қоровулбозор (1 тага) туманлари ҳамда Бухоро шаҳрида (4 тага) кўпайган. Йўл-транспорт ҳодисаларининг 52 таси тезликни ошириш оқибатида содир этилган. Бухоро шаҳрида умумий 68 та йўл-транспорт ҳодисалари содир этилган бўлиб, ҳодисаларнинг 9 таси ўлим билан якунланган.
Сессияда содир этилган йўл-транспорт ҳодисалари таҳлилларидан келиб чиқиб, ҳаракат хавфсизлигини таъминлаш, йўл-транспорт ҳодисаларининг олдини олиш мақсадида йўл ҳаракати хавфсизлигини таъминлаш бўйича вилоят махсус комиссиясининг Бухоро шаҳридаги И.Каримов, М.Иқбол, Намозгоҳ, Ибн Сино, Б.Нақшбанд ҳамда Навоий шоҳкўчаларида транспорт воситалари ҳаракатланишининг юқори тезлигини соатига 60 километр этиб белгилаш юзасидан таклифи кўриб чиқилган.
Бу борада депутатларнинг фикр-мулоҳазалари эшитилган ва маъқулланган. Ушбу таклифни тасдиқлаш учун йўл ҳаракати хавфсизлигини таъминлаш бўйича Республика махсус комиссиясига тақдим этиш белгиланган.
Изоҳ (0)