Навоийда фуқарони «Қорақўтан» конига ишга киритиб қўйиш учун 2,5 минг доллар сўраган шахслар ушланди

Навоий вилоятида ишга киритиб қўйишни ваъда қилган фирибгарлар ушланди, деб хабар бермоқда Иқтисодий жиноятларга қарши курашиш департаменти.

Қайд этилишича, Бош прокуратура ҳузуридаги департаментнинг Навоий вилоят бошқармаси томонидан ДХХ ва ИИБ билан ҳамкорликда тезкор тадбир ўтказилган. Унда фуқаролар Ғ.Э. ва Н.Э. (муқаддам фирибгарлик жинояти учун судланган) фуқаро Ф.нинг ишончига кириб, унинг ўғли С.ни танишлари ёрдамида 2 500 доллар эвазига «Қорақўтан» конига ишга киритиб қўйишини айтгани аниқланган. Улар олдиндан 10 миллион сўмни олган вақтларида ашёвий далиллар билан қўлга олинган.

Мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилган. Ҳозирда тергов ҳаракатлари ўтказилмоқда.