Ғарб ‘қизил чизиқ’нинг кенглигини ўлчамаслиги керак» — Мария Захарова

Россия Ташқи ишлар вазирлиги расмий вакили Мария Захарова Украина расмийлари ва уларнинг «ғарб ҳомийлари»дан «ифлос бомба» борасидаги «провокация»ларини тўхтатишни талаб қилди.

Захарова Украинада «ифлос бомба» яратиш билан шуғулланаётган корхоналарни бирма-бир санаб ўтди.

Биздаги маълумотларга кўра, Украина томони аллақачон режани амалга оширишга киришган. Хусусан, Жовти Води шаҳридаги Шарқий тоғ-кон бойитиш комбинати ва Киевдаги Ядро тадқиқотлари институтига шундай бомба ясаш вазифаси юклатилди. Етиб келаётган маълумотларга кўра, Украина билан «ифлос бомба» учун бутловчи қисмларни етказиб бериш бўйича музокаралар олиб бораётган баъзи Ғарб давлатлари ушбу муаммони ҳал қилишда ёрдам беришини ҳам истисно қилмаймиз.

Биз Киев ҳукумати ва уларни назорат қилаётган Ғарб ҳомийларидан дунёни ядровий фалокатга олиб келадиган ва бегуноҳ тинч аҳоли ҳаётига таҳдид солувчи ҳаракатларни бас қилишни талаб қиламиз. Россиянинг бу борадаги огоҳлантиришларига эътибор бермаслик ақлсизликдир. Вазиятни кескинлаштириш хавфли. Ғарб «қизил чизиқ» кенглигини ўлчашга уринмаслиги керак.

23 октябрь куни мудофаа вазири Сергей Шойгу НАТОнинг тўртта давлатидаги ҳамкасблари билан боғланиб, Украина «ифлос бомба» ёрдамида «провокация»ни режалаштираётганини айтди. Украина «ифлос бомба» ҳақидаги хабарларни ёлғон деб атади. Президент Владимир Зеленский Украинада бундай бомбадан фақат Россия фойдаланиши мумкинлигини айтди.

Ғарб давлатлари фикрича, Россиянинг «ифлос бомба» ҳақидаги огоҳлантиришлари янги эскалация учун баҳона. «Украина ўз ҳудудида ифлос бомба қўллашга тайёрланаётгани ҳақидаги Россиянинг очиқдан-очиқ ёлғон даъволарини барчамиз рад этамиз», — дейилади Франция, Буюк Британия ва АҚШ ташқи ишлар вазирлари қўшма баёнотида.