Украина президенти Владимир Зеленский Исроилни Россия ва Украина ўртасидаги урушда ким томонда бўлишни ҳал қилишга чақирди, деб ёзади «Украина Сейчас».

«Давлатингиз ким билан эканлигингизни танлаш вақти келмадими? Ёки мавжуд бўлган экзистенсиал таҳдидга қарши ёнма-ён курашаётган демократик дунё ёки террорнинг давом этиши харажати глобал хавфсизликни бутунлай йўқ қилиш бўлса ҳам, Россия террорига кўз юмаётганлар биланми?» — деб сўради Зеленский Haaretz Демократик саммити форуми иштирокчилари билан видео қўнғироқ орқали мулоқотда.

Украина раҳбари ўз мурожаатида Россиянинг Украина шаҳарларига Эрон дронлари ёрдамида уюштирган ҳужумларини эслади. Ва у Россия Федерациясининг Эрон ядровий дастуридаги иштирокига ишора қилди.

«Сизга саволим бор — нима деб ўйлайсиз ва Россия бунинг учун Эронга қандай тўлайди? Эронни шунчаки пул қизиқтирадими? Балки умуман пул эмас, балки Россиянинг Эрон ядро дастурига ёрдами. Эҳтимол, бу улар ўртасидаги иттифоқнинг асосий мазмунидир», — дейди Зеленский.

Аввалроқ Исроилнинг Украинадаги элчиси нима учун Исроил Киевга қурол етказиб бермаётганини изоҳлагани ҳақида хабар берилган эди.