«Тошкент шаҳридаги ижтимоий объектлар ва биноларнинг 85 фоизида ногиронлиги бўлган шахслар ҳаракатланиши учун шароит йўқ» – сенатор

Тошкент шаҳридаги ижтимоий объектлар ва биноларнинг 85 фоизида ногиронлиги бўлган шахслар ҳаракатланиши учун шароит мавжуд эмас. Бу ҳақда Сенат кенгашининг навбатдаги йиғилишида сенатор Одилжон Иминов айтиб ўтди, дея «Дарё»га маълум қилмоқда парламент юқори палатаси ахборот хизмати.

Мажлисда Одилжон Иминов шаҳарсозликда ногиронлиги бўлган шахсларнинг эҳтиёжларини ҳам ҳисобга олиш зарурлиги, уларнинг барча ижтимоий инфратузилма объектларидан монеликсиз фойдаланишига шароит яратиш муҳимлиги тўғрисида гапирган.

Тошкент шаҳри ижтимоий инфратузилмаси объектлари ва биноларининг 85 фоизи ҳанузгача ногиронлиги бўлган шахслар томонидан тўсиқсиз фойдаланиш учун мослаштирилмаган.

Биринчидан, ер ости транспортидан қулай фойдаланиш учун тўлиқ шароитлар яратилмаган. Метро станцияларининг кўплари пандуслар билан жиҳозланмаган, бу эса шаҳарсозлик меъёрлари талабларига жавоб бермайди.

Иккинчидан, ногиронлиги бўлган шахслар томонидан шаҳар ер усти транспортидан мустақил фойдаланиш имконияти тўлиқ яратилмаган. Айниқса, аравачалар ёрдамида ҳаракатланадиган ногиронлиги бўлган шахслар, кўзи ожизлар ва қулоғи оғирларнинг эркин ҳаракатланиши учун жамоат транспортининг мослашмаганлиги, хусусан автобус салонларида электрон ахборот таблоларининг, эшитиш мосламалари ва бошқа ёрдамчи воситаларнинг мавжуд эмаслиги мураккабликлар келтириб чиқармоқда.

Учинчидан, йўл бўйи инфратузилма объектлари (ер ости ва ер усти ўтиш йўллари) бир қатор сезиларли камчиликларга эга. Хусусан, айрим ер усти ўтиш йўлларида (Себзор ва А.Қодирий кўчаларининг кесишмасида) лойиҳалаштириш жараёнида лифтлар кўзда тутилган бўлса-да, амалда мавжуд эмас. Шунингдек, мазкур жойда эскалаторлар ҳам ишламайди.

Тўртинчидан, жамоат жойларида ногиронлиги бўлган шахслар учун зарур эшитиш ва кўриш маълумотлари, шу жумладан рельеф нуқтали Брайл шрифтида тайёрланган кўрсаткич ва белгилар мавжуд эмас.

Одилжон Иминов, сенатор. 

Мажлисда Ўзбекистон ногиронлар уюшмаси томонидан ўтказилган сўровномада ногиронлиги бўлган шахсларнинг 93 фоизи ер усти жамоат транспортини тўсиқсизлик нуқтаи назаридан қониқарсиз деб баҳолашгани айтилган. Шу билан бирга, пиёдалар йўлакчаларида техник мосламалар, яъни кўзи ожиз шахслар учун овозли ишора билан жиҳозланган светофор мавжуд эмаслиги сезиларли тўсиқлардан биридир. «Бу ногиронлиги бўлган шахсларнинг нафақат фаол ва мустақил ҳаракатланиш имкониятини тўсмоқда, балки йўл ҳаракати вақтида уларнинг ҳаётини хавф остига қўймоқда. Бундай ҳолатлар ногиронлиги бўлган шахсларнинг ёрдамга муҳтож тарзда ҳаракатланиш учун яқинларига қарам бўлиб қолишини тақазо этмоқда», – дея таъкидлаган сенатор.