Ун маҳсулотини узоқ муддат сақлаш маълум шартларни талаб қилади. Бу борада «Новий очаг» нашри фойдали лайфхаклар билан бўлишди.
Сотиб олаётганда унни қандай танлаш керак?
Кўпинча маҳсулотлар қадоғи ёпиқ бўлгани сабабли уларни текширишнинг имкони бўлмайди. Фақат қадоқнинг яхлитлиги, унда моғор йўқлиги, чиқарилган сана ва сақлаш муддатини текшириш мумкин. Аммо унни очишнинг иложи бўлса, уни бироз татиб кўриш керак. Агар таъм бироз аччиқ бўлса, демак, маҳсулот узоқ вақт давомида нотўғри сақланган.
Унни сотиб олаётганда, яқин атрофда, масалан, зираворлар каби кучли ҳидли маҳсулотлар бор-йўқлигига эътибор бериш лозим. Буғдой, гуруч, зиғир уни ва бошқа турлар, албатта, бегона ҳидларни ўзлаштиради, бу эса унинг таъмига таъсир қилади.
Уйда унни сақлаш учун идиш
Унни очилган қадоқда сақлаб бўлмайди. Маҳсулотни яхши ҳолатда сақлаш учун ҳаво ўтказмайдиган қопқоқли шиша идиш тавсия этилади. Бу банка ёки контейнер бўлиши мумкин. Агар бундай идишлар оғир, катта ҳажмли ва ноқулай деб ҳисобланса, маҳкамроқ жойлаштириш учун қопқоғида резина қистирмалари бўлган пластик идишдан фойдаланиш мумкин.
Зиғир халталари қуритилган мева, қўзиқорин, нонларни сақлаш учун жуда мос келади. Зиғир озиқ-овқат маҳсулотларининг нафас олишига имкон берувчи табиий материалдир, унда ун ҳам, дон ҳам моғорламайди ва ҳеч қандай ҳашаротлар пайдо бўлмайди. Улардан фойдаланиш осон, шунингдек, кам жой эгаллайди.
Унни қаерда сақлаш керак?
Ун оз миқдорда сақланса, идишларни ўзига хос ҳидли маҳсулотлардан узоқроқда, ёпиқ шкафларга қўйиш мумкин. Ёки музлаткичнинг сабзавот бўлимида сақлаш тавсия этилади.
Борди-ю, кейинчалик фойдаланиш учун кўп миқдорда ун сақланса, унда сақлаш хонаси етарлича қоронғи, қуруқ ва салқин бўлиши керак. Ҳарорат эса 15 даражадан ошмаслиги лозим. Бу, масалан, омборхона бўлиши мумкин.
Балконда эса унни фақат қишда, совуқ совуқ об-ҳаво бошланганда сақлаш мумкин. Йилнинг қолган қисмида қуёш нурлари ва намлик туфайли маҳсулотни у ерда сақлаш тавсия этилмайди.
Уй шароитида уннинг яроқлилик муддати
Ёдингизда бўлсин, ун яроқлилик муддатига эга, буни, албатта, билиб қўйиш керак. Масалан, маккажўхори ва зиғир уни қулай шароитларда 3 ойдан 6 ойгача, жавдар — фақат 6 ойгача, буғдой ва гуруч — 9 ойгача сақланади. Аммо паст ҳароратларда кукунга айлантирилган доннинг сақлаш муддати 2 йилгача давом этади.
Изоҳ (0)