Ахборот технологиялари ва коммуникацияларини ривожлантириш вазири биринчи ўринбосари Олег Пекос Россия рақамли ривожланиш, телекоммуникациялар ва оммавий коммуникациялар вазири ўринбосари Белла Черкесова билан мулоқот ўтказди. Бу ҳақда вазирлик ахборот хизмати хабар берди.
Онлайн тарзда ташкил этилган ушбу учрашувда мамлакатлар ўртасидаги икки томонлама ҳамкорликни ривожлантириш масалалари муҳокама қилинди. АКТ вазири биринчи ўринбосари О.Пекос ҳозирда дунё рақамли технологиялар таъсирида шиддат билан ўзгариб бораётгани ва ҳар қандай давлатнинг жаҳон миқёсида янада ривожланиши ва рақобатбардошлиги юқори даражада ахборот технологияларининг самарали ривожланишига боғлиқ эканини таъкидлади.
Учрашув давомида замонавий рақамли технологияларни жадал ривожлантириш Ўзбекистон давлат сиёсатининг асосий устувор йўналишларидан бири эканлиги айтиб ўтилди. Мамлакат ялпи ички маҳсулотида ахборот технологиялари соҳасининг улушини кўтарган ҳолда кейинги беш йилда дастурий маҳсулотлар экспортини бир неча баробарга оширишни таъминлаш мақсад қилинган. Иқтисодиётни рақамлаштиришни жадаллаштириш бўйича вазифаларни бажаришда хорижий ҳамкорларнинг ўрни катта келтирилди.
Ўтказилган учрашувда ҳам ахборот технологиялари соҳасидаги жаҳон тенденциялари ва мамлакатлар ўртасидаги ҳамкорликнинг ривожланиш динамикасини ҳисобга олган ҳолда, ахборот-коммуникация технологиялари соҳасидаги Ўзбекистон–Россия ҳамкорлигини янги босқичга кўтариш масалаларига эътибор қаратилди.
Изоҳ (0)