Ўзбекистон ва Саудия Арабистони савдо-иқтисодий ва сармоявий ҳамкорликни мустаҳкамлаш ниятида. Бу ҳақда Инвестициялар ва ташқи савдо вазирлиги матбуот хизмати вазир биринчи ўринбосари Лазиз Қудратов ва Саудия Арабистони инвестициялар вазири ўринбосари Бадр ал-Бадр ўртасидаги музокаралар якунлари бўйича маълум қилди.
Суҳбат чоғида икки томонлама савдо-иқтисодий ва сармоявий ҳамкорликни мустаҳкамлаш йўллари, шунингдек, жорий йилнинг август ойида Саудия Арабистонига бўлиб ўтган олий даражадаги ташриф якунлари бўйича эришилган лойиҳаларни амалга ошириш бўйича келишувларни ҳаётга татбиқ этиш кўриб чиқилди.
Матбуот хизмати маълумотларига кўра, сўнгги беш йил ичида Ўзбекистонда Саудия Арабистони капитали иштирокидаги корхоналар сони беш баробарга кўпайган – 38 тагача.
Айни пайтда Саудия Арабистонининг ACWA Power компанияси Ўзбекистонда энергетика соҳасида 4 миллиард доллардан ортиқ қийматидаги бир қанча йирик сармоявий лойиҳаларни амалга оширмоқда.
Шунингдек, томонлар ўртасида кимё, тиббиёт, фармацевтика ва қишлоқ хўжалиги соҳаларидаги лойиҳаларни амалга оширишнинг ҳозирги ҳолати таҳлил қилинди.
Изоҳ (0)