Газ плитасининг узоқ вақт давомида тўғри ишлашини истасангиз, қуйидаги хатоларни такрорламаслик тавсия этилади, деб ёзади Lifehacker.
Фойдаланувчи қўлланмасига амал қилмаслик
Албатта, уни ўқиш жуда зерикарли, лекин у газ плитасига ғамхўрлик қилиш ҳақида фойдали маълумотларни ўз ичига олади. Ишлаб чиқарувчилар кўпинча қандай ҳаракатлардан қочиш ва бузилиш ҳолатларида нима қилиш кераклигини кўрсатади. Шунинг учун ускунани сотиб олгандан кейин кўрсатмани йўқотиб қўймаслик керак.
Овқат пишириш вақтида чалғиш
Сув қайнаётганда ёки таом пиширилаётганда бошқа ишлар ҳам амалга оширилиши мумкин. Аммо бу вақтда плитага сув ёки суюқлик тўкилиши натижасида муаммолар юзага келади. Бу эса қурилманинг ишлашига зарар етишига сабаб бўлади. Шунинг учун бу вақтда газ плитасини эътиборсиз қолдирмаслик ва агар бирор нарса тўкилса, доғнинг қуриб кетишига йўл қўймаслик керак.
Газ конфоркаларини тозаламаслик
Агар газ аввалгидек яхши ёнмаётган бўлса, унинг конфоркаларини тозалаш вақти келган бўлиши мумкин. Бу муаммони эътиборсиз қолдирмаслик керак, акс ҳолда газ таъминоти ёмонлашади ва қурилма ишдан чиқади. Тозалашдан олдин газни ўчиришни унутмаслик лозим.
Шиша плитани тез-тез тозаламаслик
Шиша плита замонавий қурилмалардан бири, аммо унга тўғри ғамхўрлик қилинмаса, чизиқ, доғ ва ёғлар унинг чиройли кўринишини йўққа чиқаради. Шунинг учун бирор нарса пиширилгандан сўнг плитани дарҳол тозалаш керак, шундагина у узоқ вақт давомида асл кўринишини сақлаб қолади.
Тозалаш пайтида плита устига кўп сув қуйиш
Бу қисқа туташувга ва занг пайдо бўлишига олиб келиши мумкин. Ҳар қандай суюқликни плита устига қуймаслик керак, тозалаш учун губкани намлаш ва ундан фойдаланиш тавсия этилади. Сўнгра юза қуруқ мато билан артиб олинади.
Ўткир кимёвий тозалаш воситаларидан фойдаланиш
Уйда мавжуд бўлган тозалаш маҳсулотлари кўпинча кимёвий моддаларга бой ўткир воситаларга қараганда самаралироқ ва хавфсизроқдир. Мисол учун, оддий истеъмол содаси қорайган ёки куйган жойни яхши тозалайди. Уни плита юзасига сепиб, нам латта билан артиб олиш керак. Агар доғ кетмаса, сода устига сирка қуйиш ва яна ишқалаш тавсия этилади.
Плитани симли чўтка ёки шимгич билан тозалаш
Улар қурилмага осонгина зарар етказиши мумкин, шунинг учун улар тозалаш учун мутлақо яроқсиз деб ҳисобланади. Плитани тозалаш учун юмшоқ мато ёки губкани ишлатиш лозим.
Газ ҳидига эътиборсизлик
Газнинг ҳиди қурилма билан боғлиқ муаммоларни кўрсатади. Агар у жуда кучли ёки қурилма ўчирилгандан кейин ҳам пайдо бўлса, дарҳол мутахассисга мурожаат қилиш лозим. Бу вақтгача газни ўчириб, деразаларни очиб, чироқларни ўчириш зарур.
Носозликни тузатишга уриниш
Нима бўлаётганини билсангиз ҳам таъмирлашни профессионалларга ишонган маъқул. Қурилманинг ички қисмини очиб кўриш ва қайта йиғиш натижасида хатолик юз бериши ва бу бошқа жиддий муаммоларга сабаб бўлиши мумкин. Газ ва электр энергияси билан ҳазиллашмаслик керак.
Изоҳ (0)