НАТО Европада ядровий ўқув машқларини бошлайди

НАТОнинг ядровий тийиб туриш бўйича Steadfast Noon («Мустаҳкам чошгоҳ») режали ўқув машғулотлари бугун, 17 октябрь куни бошланиб, 30 октябрга қадар давом этади, унда 14 та мамлакат ва 60 тагача ҳарбий самолётлар қатнашади, деб хабар беради EA Daily. Альянс баёнотига кўра, машқлар «Европа шимоли-ғарби осмонида» — Бельгия ва Британия ҳаво ҳудудида, шунингдек, Шимолий денгиз осмонида ўтказилади. Машғулотлар чоғида жанговар қуролдан фойдаланилмайди.

Бельгия ОАВлари аниқлик киритишича, мамлакат Ҳарбий-ҳаво кучларининг Лимбург провинциясидаги Кляйн Брогель базаси машғулотлар маркази вазифасини ўтайди. Бельгиянинг ядро қуролига қарши коалицияси маълумотларига қараганда, у ерда АҚШ ядровий каллаклари сақланади. Расмий ҳукумат бу маълумотни тасдиқлагани йўқ.

Альянс бош котиби Йенс Столтенберг аниқлик киритишича, «бу ҳар йили ўтказиладиган режали машқлар бўлиб, НАТОнинг ядровий имкониятлари хавфсизлиги ва самарадорлигини таъминлашга қаратилган». Унинг таъкидлашича, ҳарбий машғулотлар Украина атрофидаги жорий инқироз билан боғлиқ эмас.

Бельгиянинг RTBF телеканали хабарига кўра, машғулотларда иштирок этаётган НАТО мамлакатлари ҳарбий самолётларининг бирортаси ҳам Россия ҳудудига 1000 километрдан ортиқ яқинлашмайди.

Шунга қарамай, Бельгиянинг ядро қуролига қарши коалицияси кескин халқаро муҳитни ҳисобга олган ҳолда, машқларни бекор қилишни талаб этди. «Россия билан ядровий соҳада кескинлик юқори бўлган даврда бундай машғулотларни ўтказиш масъулиятсизликдир», — дейилади ташкилот баёнотида.

Ядрога қарши коалиция тахмин қилишича, Бельгия ҳудудидаги бундай машғулотлар ядровий зиддият юзага келган тақдирда, ушбу мамлакатни потенциал нишонга айлантиради, айниқса, Брюсселда НАТО бош қароргоҳи ва Евроиттифоқнинг бош институтлари жойлашганини ҳисобга олганда.

Шу йилнинг июнь ойида Мадриддаги саммитда янгиланган НАТО Стратегик концепциясида альянс етакчилари «ядро қуроли мавжуд бўлиб турар экан, НАТО ядро иттифоқи бўлиб қолиши»ни тасдиқлаган эди.