Тошкент вилоятининг Зангиота ва Бўка туманларида дори воситаларининг ноқонуний муомалага киритилишининг олди олинди. Бу ҳақда Иқтисодий жиноятларга қарши курашиш департаменти хабар қилди.
Қайд этилишича, Бош прокуратура ҳузуридаги департаментнинг Зангиота туман бўлими томонидан ИИБ ходимлари билан ҳамкорликда тезкор тадбир ўтказилган. Унда фуқаро А.А. дори воситаларини дорихоналардан ташқарида муомалага киритиш орқали даромад орттиришни кўзлаб, фуқаро И.га тегишли ҳужжатлари бўлмаган 3 турдаги 9 304 қути «Азедсин 250», 7 068 қути «Азедсин 500», 6 000 дона «Тевартем» номли хорижда ишлаб чиқарилган дори воситаларини жами 17 330 долларга сотган вақтида ашёвий далиллар билан ушланган.
Шунингдек, департаментнинг Бўка туман бўлими томонидан ўтказилган тезкор тадбирда Г.Ш. МЧЖ раҳбари А.С. ушланган. У фуқаро С.га туман марказидаги автомобиллар ювиш шохобчаси олдида яроқлилик муддати ўтган 408 дона «Ремдесивир» ҳамда 326 дона «Ремдесивир Жуби-Р» номли жами 734 дона дори воситаларини 11 000 долларга сотаётгани аниқланган.
Мазкур ҳолатлар юзасидан Жиноят кодексининг 186-3-моддаси (сифатсиз ёки қалбакилаштирилган дори воситаларини ёхуд тиббий буюмларни ўтказиш мақсадида ишлаб чиқариш, тайёрлаш, олиш, сақлаш, ташиш ёки ўтказиш, шунингдек, дори воситаларини дорихоналардан ва уларнинг филиалларидан ташқарида реализация қилиш) билан жиноят ишлари қўзғатилган. Ҳозирда тергов ҳаракатлари ўтказилмоқда.
Изоҳ (0)