21 октябрь — Ўзбек тилига давлат тили мақоми берилган кун муносабати билан Ўзбекистон Бош консулхонаси томонидан Макка шаҳридаги «Hotel Маккаҳ бй Millennium» меҳмонхонасида ватандошлар иштирокида тадбир ўтказилди, деб хабар бермоқда «Дунё» АА.
Таъкидланишича, иштирокчиларга Ўзбекистонда ўзбек тилининг мавқейини мустаҳкамлаш, она тилининг халқаро миқёсдаги нуфузини ошириш бўйича амалга оширилаётган ишлар хусусида батафсил сўзлаб берилди. Бу борада хориждаги кўплаб университетларда ўзбек тили марказлари ташкил этилгани ва чет мамлакатларда ўзбек тилини ўрганишга қизиқувчиларнинг сони йил сайин ортиб бораётгани қайд этилди.
Ҳозирги кунда ер юзида ўзбек тилида сўзлашувчилар сони 60 миллиондан ошди, хорижий давлатлардаги 50 дан ортиқ олий ўқув юртида ўзбек тили ўргатилмоқда.
Саудия Арабистонида истиқомат қилаётган асли ўзбек бўлган бухорийлар диаспораси вакиллари ўзбек тилининг жамиятдаги мавқейини юксалтириш долзарб вазифага айланиб бораётганини қайд этди. Бўлиб ўтган учрашув якунида Саудия ҳудудида ўзбек тилини кенг тарғиб қилиш, диаспора вакиллари фарзандларининг миллий тилни мукаммал эгаллаши учун махсус курслар ташкил этиш ва уларни зарур адабиётлар билан таъминлашга келишиб олинди.
Изоҳ (0)