Путин қисман сафарбарлик икки ҳафта ичида якунланишини тахмин қилди

Россияда қисман сафарбарлик доирасида аллақачон 220 мингдан ортиқ одам ҳарбий хизматга чақирилган, икки ҳафта ичида тадбирлар якунланиши мумкин. Бу ҳақда Россия президенти Владимир Путин Остонадаги матбуот анжуманида маълум қилди.

«300 минг кишидан 222 минг нафари сафарбар қилинди. Тахминан икки ҳафталарда барча сафарбарлик тадбирлари якунланади деб ўйлайман», — деди Путин.

Унинг сўзларига кўра, «бу иш тугаб бормоқда». Шунингдек, Путиннинг айтишича, Мудофаа вазирлиги «дастлаб 300 киши эмас, балки кичикроқ рақамни кўзда тутган». Унинг қўшимча қилишича, бу рақамга қўшимча тарзда идорадан сафарбарлик бўйича чақирувга оид ҳеч қандай таклифлар келиб тушмаган. «Яқин келажакда бунга ҳеч қанақа зарурат кўрмаяпман», — деди давлат раҳбари.

Путиннинг сўзларига кўра, аввалроқ у айтиб ўтган сафарбарлик билан боғлиқ «тартибсизликлар» ўн йилликлар давомида янгиланмаган эски ҳисоб шакллари туфайлидир. Энди ахборот базаси янгиланмоқда, маълумот максимал даражада ишончли бўлади, деди у.

Россия президенти, шунингдек, сафарбар этилганларнинг барчаси мажбурий тайёргарликдан ўтиши кераклигини таъкидлади.

Айни пайтда сафарбар қилинганларнинг 16 минг нафари жанговар топшириқларни бажариш учун жалб этиладиган бўлинмаларга жойлаштирилган, деди у.

Аввалроқ Россия ҳукумати биринчи марта сафарбар қилинганлар фронтда ҳалок бўлгани ҳақида хабар берган ва Челябинск вилоятидан сафарбар қилинган беш киши «Донбассда махсус ҳарбий операция ҳудудида» ҳалок бўлганини маълум қилганди.

Россияда қисман сафарбарлик эълон қилинди

21 сентябрь куни Россия президенти Владимир Путин Россияда қисман сафарбарлик эълон қилиш ҳақидаги фармонни имзолади. «Ватанимиз, яхлитлигимизни ҳимоя қилиш учун қисман сафарбарликни қўллаб-қувватлаш зарур, деб ҳисоблайман», — деди Россия раҳбари.

Россия мудофаа вазири Сергей Шойгунинг айтишича, қисман сафарбарлик чоғида 300 минг захирадаги аскар чақирилади. Унинг сўзларига кўра, бу Россия сафарбарлик ресурсининг тахминан 1 фоизини ташкил қилади. Хизмат ўтаб бўлган, ҳарбий-ҳисоб мутахассислиги ва жанговар тажрибага эга бўлганларгина чақирилади. Талабалар ва шошилинч хизмат ҳарбий хизматчилари сафарбар этилмайди, деган эди Шойгу.

Армияга чақириладиган одамлар сони кўрсатилган банд сафарбарлик ҳақидаги фармонда махфийлаштириб қўйилган. «Новая газета. Европа» нашри хабарига кўра, ушбу бандда бир миллион киши армияга чақирилиши ҳақида айтилади. Meduza’нинг федерал вазирликлардан бирига яқин манбаси айтиб беришича, армияга 1,2 миллион кишини чақириш режалаштирилмоқда.