Putin qisman safarbarlik ikki hafta ichida yakunlanishini taxmin qildi

Rossiyada qisman safarbarlik doirasida allaqachon 220 mingdan ortiq odam harbiy xizmatga chaqirilgan, ikki hafta ichida tadbirlar yakunlanishi mumkin. Bu haqda Rossiya prezidenti Vladimir Putin Ostonadagi matbuot anjumanida ma’lum qildi.

“300 ming kishidan 222 ming nafari safarbar qilindi. Taxminan ikki haftalarda barcha safarbarlik tadbirlari yakunlanadi deb o‘ylayman”, — dedi Putin.

Uning so‘zlariga ko‘ra, “bu ish tugab bormoqda”. Shuningdek, Putinning aytishicha, Mudofaa vazirligi “dastlab 300 kishi emas, balki kichikroq raqamni ko‘zda tutgan”. Uning qo‘shimcha qilishicha, bu raqamga qo‘shimcha tarzda idoradan safarbarlik bo‘yicha chaqiruvga oid hech qanday takliflar kelib tushmagan. “Yaqin kelajakda bunga hech qanaqa zarurat ko‘rmayapman”, — dedi davlat rahbari.

Putinning so‘zlariga ko‘ra, avvalroq u aytib o‘tgan safarbarlik bilan bog‘liq “tartibsizliklar” o‘n yilliklar davomida yangilanmagan eski hisob shakllari tufaylidir. Endi axborot bazasi yangilanmoqda, ma’lumot maksimal darajada ishonchli bo‘ladi, dedi u.

Rossiya prezidenti, shuningdek, safarbar etilganlarning barchasi majburiy tayyorgarlikdan o‘tishi kerakligini ta’kidladi.

Ayni paytda safarbar qilinganlarning 16 ming nafari jangovar topshiriqlarni bajarish uchun jalb etiladigan bo‘linmalarga joylashtirilgan, dedi u.

Avvalroq Rossiya hukumati birinchi marta safarbar qilinganlar frontda halok bo‘lgani haqida xabar bergan va Chelyabinsk viloyatidan safarbar qilingan besh kishi “Donbassda maxsus harbiy operatsiya hududida” halok bo‘lganini ma’lum qilgandi.

Rossiyada qisman safarbarlik e’lon qilindi

Rossiya mudofaa vaziri Sergey Shoyguning aytishicha, qisman safarbarlik chog‘ida 300 ming zaxiradagi askar chaqiriladi. Uning so‘zlariga ko‘ra, bu Rossiya safarbarlik resursining taxminan 1 foizini tashkil qiladi. Xizmat o‘tab bo‘lgan, harbiy-hisob mutaxassisligi va jangovar tajribaga ega bo‘lganlargina chaqiriladi. Talabalar va shoshilinch xizmat harbiy xizmatchilari safarbar etilmaydi, degan edi Shoygu.

Armiyaga chaqiriladigan odamlar soni ko‘rsatilgan band safarbarlik haqidagi farmonda maxfiylashtirib qo‘yilgan. “Novaya gazeta. Yevropa” nashri xabariga ko‘ra, ushbu bandda bir million kishi armiyaga chaqirilishi haqida aytiladi. Meduza’ning federal vazirliklardan biriga yaqin manbasi aytib berishicha, armiyaga 1,2 million kishini chaqirish rejalashtirilmoqda.