Фарғона вилояти ҳокими Хайрулло Бозоров «Заковат» интеллектуал ўйинининг финал босқичи ғолиби бўлган ўқувчилар билан учрашди. Бу ҳақда «Дарё» мухбири Азизжон Эрматов хабар бермоқда.
Қайд этилишича, 2022 йилнинг 9 октябрь куни Тошкент шаҳрида умумтаълим мактаблари ўқувчилари ўртасида «Заковат» интеллектуал ўйинининг якуний босқичи ўтказилган. Унда республиканинг ҳар бир ҳудудидан 3 тадан жами 42 та жамоа иштирок этган. Финал босқичида Фарғона туманидаги 36-мактаб жамоаси ғолибликни қўлга киритган.
Хайрулло Бозоров ўқувчиларни ғолиблик билан қутлаб, уларнинг ҳар бири ҳақида тенгдошларига ибрат сифатида алоҳида мақолалар ва кўрсатувлар тайёрланишини маълум қилган.
Учрашувда ғолиб жамоа аъзолари ва уларнинг устозига вилоят ҳокимининг қимматбаҳо совғалари топширилган.
Маълумот учун, президент қарорига асосан, турнир совриндори бўлган ўқувчиларга бир йил давомида ҳар ой «Заковат» стипендияси берилади.
Шунингдек, ғолиб ўқувчилар олий таълим муассасаларига тўлов-контракт асосида имтиҳонларсиз талабаликка қабул қилинади.
Изоҳ (0)