Қирғизистон 2023—2025 йилларга мўлжалланган Бирлашган Миллатлар Ташкилоти Инсон ҳуқуқлари кенгашига аъзолик учун сайловларда ғалаба қозонди. Бу ҳақда Қирғизистон Ташқи ишлар вазирлиги матбуот хизматига таяниб, «24.kg» хабар берди.
Осиё давлатлари орасида БМТнинг Инсон ҳуқуқлари бўйича кенгашига аъзо бўлиш учун олтита давлат ариза топширган: Қирғизистон, Афғонистон, Бангладеш, Вьетнам, Мальдив ороллари ва Корея. БМТга аъзо 126 давлат Қирғизистоннинг БМТ Инсон ҳуқуқлари бўйича комиссиясига кириши учун овоз берган.
ТИВ қайд этишича, Қирғизистоннинг БМТ Инсон ҳуқуқлари бўйича комиссиясига яна сайланиши «мамлакатнинг инсон ҳуқуқлари соҳасидаги ютуқлари, инсон ҳуқуқларини ҳимоя қилиш ва илгари суриш бўйича глобал кампанияга келажакдаги ҳиссаси жаҳон ҳамжамияти томонидан эътироф этилиши»ни англатади.
Бунгача Қирғизистон икки марта БМТ Инсон ҳуқуқлари кенгаши аъзоси бўлган: 2009—2012 ва 2016—2018 йилларда.
Инсон ҳуқуқлари бўйича кенгаш БМТ тизимининг ҳукуматлараро органи бўлиб, у бутун дунёда инсон ҳуқуқларини ҳимоя қилиш учун масъул 47 давлатдан иборат. Кенгаш ваколатига инсон ҳуқуқлари соҳасидаги барча масалалар ва вазиятларни муҳокама қилиш киради.
Инсон ҳуқуқлари бўйича кенгаш йиғилишлари БМТнинг Женевадаги офисида бўлиб ўтади.
Изоҳ (0)