Rossiyada safarbarlikdan bosh tortish bo‘yicha birinchi jinoyat ishi qo‘zg‘atildi

Rossiyada safarbarlik doirasida harbiy xizmatdan bosh tortganlik uchun birinchi jinoyat ishi qo‘zg‘atildi, deb yozadi “Izvestiya”. Rossiya Tergov qo‘mitasi 5-oktabr kuni ma’lum qilishicha, ushbu ish ishtirokchisi Penza shahri fuqarosi bo‘lgan.

Gumonlanuvchiga nisbatan “harbiy xizmatga chaqiruvdan bosh tortish” moddasi bo‘yicha ish qo‘zg‘atilgan, u ikki yilgacha koloniya jazosini ko‘zda tutadi.

Tergov ma’lumotlariga ko‘ra, harbiy hisobda turuvchi erkakka 23-sentabr kuni bildirishnoma yuborilib, qisman safarbarlik doirasida harbiy komissariatga yuborilish uchun 26-sentabr kuni Penza tumani Kondol qishloq kengashiga kelish so‘ralgan.

“Harbiy xizmatdan ozod etilish uchun qonuniy asoslarga ega bo‘lmagan holda, u chaqiroq qog‘ozi bo‘yicha kelmadi”, — deyiladi idora xabarida.

Eslatib o‘tamiz, 21-sentabr kuni Rossiyada qisman safarbarlik e’lon qilindi. 24-sentabr kuni esa Putin harbiy xizmat haqidagi tuzatishlar paketini imzoladi. Unga ko‘ra, zaxiradan harbiy to‘planishlarga chaqirilganlar kelmaganligi yoki xizmat o‘tash joyini o‘zboshimchalik bilan tark etganlar shartnoma bo‘yicha harbiy xizmatchilar bilan bir qatorda jinoiy javobgarlikka tortiladi.

20-sentabrda esa Davlat dumasi dezertirlik va ixtiyoriy ravishda asirlikka tushganlik uchun jazolar haqidagi tuzatishlar bilan qonunni qabul qilgandi. O‘shanda chaqiriq bo‘yicha harbiy xizmatga kelmaganlik yoki dezertirlik uchun besh yildan o‘n yilgacha ozodlikdan mahrum etish jazosi qo‘llanilishi aytilgandi.

Bundan avvalroq, 14-iyul kuni Putin dushman tomonga o‘tib ketishni davlatga xiyonatga tenglashtiruvchi qonunni imzolagandi.