Арманистон Миллий хавфсизлик хизмати Қрим кўпригидаги портлашга Арманистон фуқароси алоқадорлиги эҳтимоли ҳақида маълумотлар пайдо бўлганидан кейин, халқаро терроризмга ҳамкорлик қилиш ҳақида жиноий иш қўзғатди, деб ёзади «Коммерсантъ». Бундан ташқари, терговчилар қалбаки ҳужжатлардан фойдаланиб, Евросиё иқтисодий иттифоқи (ЁИИ) чегарасидан портловчи моддалар контрабанда қилингани ҳақидаги ахборотни ҳам текширади.
Миллий хавфсизлик хизмати қайд этишича, иш Қрим кўпригидаги портлаш юз берган «вазиятни аниқлаштириш ва олинган маълумотларнинг ишончлилигини текшириш» учун очилган.
Россия махсус хизматларининг кўприкни портлатишда Арманистон фуқароси қатнашгани эҳтимоли ҳақидаги маълумотини Арманистон Бош прокуратураси 12 октябрь куни мамлакат Хавфсизлик хизматига тақдим этганди.
Қрим кўпригида 8 октябрь куни юк машинаси портлаб кетди, оқибатда автомобиль йўлининг бир қисми қулаб тушди. Россия Тергов қўмитаси ҳодисани Украина махсус хизматлари томонидан амалга оширилган теракт деб баҳоламоқда. Тергов версиясига кўра, жиноятни уюштиришда 12 киши — беш нафар россиялик ҳамда Украина, Грузия ва Арманистон фуқаролари қатнашган. Даъво қилинишича, портловчи қурилма Одесса портидан Болгариянинг Русе шаҳрига юборилган, юк Ереванда ЁИИ қоидалари бўйича божхона расмийлаштирувидан ўтган. Шундан кейин у Арманистон компанияларидан бири томонидан юборилган.
Аввалроқ Россия Федерал хавфсизлик хизмати Қрим кўпригидаги портлаш юзасидан қўзғатилган жиноий иш доирасида беш нафар россиялик, уч нафар украиналик ва арманистонлик фуқаролар қўлга олинганини маълум қилганди. Улар жиноятни тайёрлашда иштирок этганликда гумонланмоқда.
Мавзуга доир:
Изоҳ (0)