Сирдарё вилояти ҳокимлиги Молия бошқармаси бошлиғи лавозимида ишлаб, ноҳақ судланиб кейин оқланган Абдурауф Тожиев ўз лавозимига қайта тикланди. Бу ҳақда ҳуқуқшунос Саидали Мухторалиев «Дарё»га маълум қилмоқда.
Маълум бўлишича, Абдурауф Тожиев Сирдарё вилояти ҳокимлиги Молия бошқарма бошлиғи лавозимида ишлаган. У судланган, кейинчалик 4 йил аввал суд томонидан тўлиқ айбсиз деб топилиб, оқланган. Оқланганидан сўнг, у киши ўз ишига тикланиш учун судга даъво киритган ва фуқаролик суди уни ўз ишига тиклаш ҳақида қарор чиқарган.
Иш берувчи апелляция шикояти берган, апелляция суди ҳам ходимни ҳақ деган қарорга келган. Бироқ иш берувчи орадан 1 йил ўтса ҳам ходимни ўз ишига тикламаган. Унинг таъсири катта бўлгани учунми, кейинчалик Олий суд кассация ҳайъати қуйи судларнинг қарорларини ўзгартириб, ходимни «аввалги ишига тенг бўлган лавозимига тиклаш ҳақида» қарор чиқарган. Аммо ходимни ўз ишига ҳам тиклашмаган, тенг лавозимга ҳам қўйишмаган.
Ҳуқуқшунос, Саидали Мухторалиевнинг таъкидлашича, ўшанда Олий суд кассация ҳайъати мутлақо ноқонуний қарорга келган, яъни ходим айнан ўзининг лавозимига тикланиши шарт эди, бошқа лавозимга эмас:
Қонунчиликда тенг лавозимга тиклаш ҳақида фақат иккита қоида бор: биринчиси, Жиноят процессуал колексининг 310-моддаси, иккинчиси эса Меҳнат кодексининг 271-моддаси. Иккала модда бўйича ноҳақ судланган ходимни ишга тиклашда қачонки, корхона тугатилган бўлса, ходимнинг иш ўрни қисқартирилган бўлса ва кейингиси, уни айнан ўз лавозимига тиклашга монеълик қиладиган қонунда назарда тутилган аниқ асослар бўлсагина, ходимни лавозимига тенг бўлган бошқа лавозимга тиклаш мумкин. Лекин Абдурауф Тожиевнинг ишида ана шу 3 та ҳолатнинг бирортаси ҳам бўлмаган, яъни уни ўзининг иши қолиб, бошқа лавозимга тиклаш учун ҳеч қандай асос, шу жумладан, ўз ишига тиклашга тўсқинлик қиладиган бирор-бир қонунда кўрсатилган асос йўқ эди.Тўрт йил сарсон бўлган Абдурауф Тожиев Олий суднинг раиси Бахтиёр Исламовнинг қабулига кириб, муаммони атрофлича тушунтирган. Натижада Олий суд раиси ўринбосари томонидан олдинги кассация судининг ноқонуний қарорини бекор қилиш ва ишни такрорий кассация тартибида кўриш юзасидан протест киритилган.Олий суд кассация ҳайъати бу масалага умуман эътибор қаратмаган ва «тенг лавозимга тиклансин» деб қарор чиқарган. Қизиқ жиҳати, Фуқаролик процессуал кодексининг 405-моддасига асосан жавобгар иш берувчи ишга тиклашга доир биринчи инстанция суди қарори устидан кассация шикояти бериш учун ўша биринчи судининг ҳал қилув қарорини ижро қилиб, яъни ходимни ишга тиклаб, унинг тикланганлиги ҳақидаги буйруқ нусхасини кассация шикоятига илова қилиши шарт. Акс ҳолда, Олий суд томонидан бундай кассация шикояти иш юритувга қабул қилинмайди ва шикоят қаноатлантирилмайди. Бироқ Олий суднинг кассация суди ушбу қоидага амал қилмай, иш берувчининг асоссиз шикоятини қаноатлантириб берган. Улар, ходим ишига тикланмай туриб, ишни кассация тартибида кўрган ва Фуқаролик процессуал кодексининг 405-моддани қўпол равишда бузган.
Иш 12 октябрь куни Олий суд судьяси Г.Парпиева раислигида 5 нафар судьялар иштирокида такроран кассация тартибида кўриб чиқилган. Унда аввалги кассация қарори бекор қилиниб, Абдурауф Тожиевни айнан ўзининг Сирдарё вилояти Молия бошқарма бошлиғи лавозимига тиклаш белгиланган.
Қўшимча қилинишича, Абдурауф Тожиев сарсонгарчиликда ўтган йиллари ва ишсиз қолган даври учун моддий зарарни ундириш учун судга даъво киритмоқчи.
Аввалроқ Олий суд Соғлиқни сақлаш вазирлигининг ноқонуний бўшатилган икки ходими ишга қайта тиклаб, уларга етказилган 338 миллион сўмлик моддий зарар қоплаб берилиши ҳақида қарор қабул қилган эди.
Изоҳ (0)