Қашқадарё вилоятининг Касби тумани ҳокими Тўхтамурод Мейлиев кеча, 12 октябрь куни Қарши шаҳридаги Журналистлар уйида ОАВ вакиллари билан учрашиб, уларни қизиқтирган саволларга жавоб берди. Бу ҳақда «Дарё»га блогер Азизбек Яздурдиев хабар берди.
Маълум қилинишича, Тўхтамурод Мейлиев журналист ва блогерларга туманда «Обод қишлоқ», «Обод маҳалла» лойиҳалари доирасида амалга оширилаётган ишлар ҳақида маълумот бергач, ОАВ вакилларини қизиқтирган саволларга жавоб берган.
Тадбирда сўз олган блогер Азизбек Яздурдиев ҳоким Тўхтамурод Мейлиевга савол бериб, туризм масаласидаги камчиликлари боис президент Шавкат Мирзиёев раислигидаги видеоселекторда ишдан олингани ва ўзгариши учун уч ойлик синов муддати қайси хатоси учун бўлган деб ўйлашини, шунингдек, «Дарё» нашрининг бу ҳақдаги саволларига нега жавоб беролмагани сабабини сўраган.
Ҳақиқатан ҳам туризм соҳасида қиладиган ишларимиз кўп. Шахсан ўзим ҳам инсон сифатида қаергадир бормоқчи бўлсам аввало шу ҳудуднинг туристик салоҳиятини кўрсатувчи роликларни кўраман. Бугун ҳаммамизда телефон ва интернет бор, шундай пайтларда тезда интернетга кириб яхши жойларни излай бошлаймиз. Шу сабаб биз ҳам туманнинг туристик салоҳиятини очиб берувчи 1,5 дақиқалик ролик тайёрлаяпмиз. Шуни тарқатиш масаласида телевидениега ҳам илтимос қиляпмиз. Обуначиларингиз кўплиги сабаб сизлардан ҳам илтимос қилардик, — дейди туман ҳокими туризм масаласидаги саволга жавоб берар экан.Ҳоким «Дарё» нашри сўровига беписандлик қилганининг сабабига ҳам тўхталган.
Ҳақиқатан ҳам шу масалада бизга саволлар берилганди. Айнан мухбирнинг ўзи билан гаплашолмадик. Қолаверса ўша кунлари меҳмонларимиз кўпайган эди. Вақт ажратолмадик. Аммо бу беписандлик эмас. Шу масалада менга Усмон ака ҳам (АОКАнинг вилоят бошқармаси бошлиғи. «Дарё» изоҳи) телефон қилиб, маълум қилганди. Албатта боғланиб, саволларга жавоб берамиз дегандик. Аммо ўша куни кечки пайт бу ҳақидаги мақола чиққан экан, — дейди ҳоким.Ҳоким қўл остидаги ходимлари мақолага раддия бериш кераклигини айтганини, аммо ўзи айбини тан олиб, раддия масаласини рад этганини билдирган.
Булар раддия берамиз дейишди. Лекин мен мавриди келганда бу ҳақда гапиришимизни айтдим. Мана бугун мавриди келган экан, шу саволга ҳам аниқлик киритиб олдик. Мен доим оммавий ахборот воситаларига очиқ бўлишга, уларнинг ҳар қандай сўровига ўз вақтида жавоб беришга ҳаракат қиламан. Боиси биз матбуотга қанча ёпиқ бўлсак, шунча ўзимизга зарар етказган бўламиз, — деган Тўхтамурод Мейлиев.2022 йилнинг 19 сентябрь куни Шавкат Мирзиёев раислигида бўлиб ўтган ички ва ташқи туризм салоҳиятини янада ошириш чора-тадбирлари ҳақидаги видеоселекторда бир неча ҳокимлар иши танқид қилиниб, 14 нафари ишдан олинганди. Шундан сўнг Самарқанд вилоятининг Ургут тумани ҳокими, Наманган вилоятининг Тўрақўрғон ва Косонсой тумани ҳокимлари ОАВ орқали чиқиш қилиб, танқиддан қилинган хулосасини, шунингдек, уч ойлик синов муддатида қайси ишларни амалга ошириб, хатосини тузатмоқчи экани ҳақида ахборот берганди.
«Дарё» мазкур масала юзасидан сўровини давом эттириб, президент танқидига дучор бўлган қашқадарёлик ҳокимлар — Касби, Қамаши, Шаҳрисабз ва Яккабоғ тумани раҳбарларига мурожаат қилганди. Ва атиги 2 та савол берганди. Мухбир ҳокимларга туризмни ривожлантириш борасидаги қайси камчилигим учун президент танқидига учрадим деб ўйлашию, берилган уч ойлик муддатда нималар қилиб, давлат раҳбари ва туман аҳолиси ишончига эришаман деб режалаштираётгани билан қизиққанди. Касби тумани ҳокими Қамаши ва Яккабоғ ҳокимлари қатори «Дарё»нинг бу ҳақдаги сўровига жавоб беролмаганди.
Изоҳ (0)