Соғлом нонушта учун 5 хил творогли егулик рецепти

Творогли нонуштани тез ва осон тайёрлаш мумкин. Бундан ташқари, творог барча ёшдагилар учун ёқимли ва фойдали бўлиб, ҳамма турдаги егулик ва ширинликларга қўшиш мумкин бўлган ажойиб маҳсулот ҳисобланади. «Новий очаг» нашри нонушта учун фойдали бўлган творогли егулик рецептлари билан бўлишди.

Ичига творог солинган лавашли пирог рецепти

Лаваш хамиридан юмшоққина пирог тайёрлаш учун қуйидаги рецепт тавсия этилади. Мазаси барчага манзур келиши шубҳасиз.

Керакли маҳсулотлар:

• творог — 400 грамм;
• пишлоқ — 200 грамм;
• тухум — 3 дона;
• сметана — 3 ош қошиқ;
• кефир — 250 мл;
• лаваш — 3-4 дона;
• кўкат, туз ва зираворлар.

1. Қирғичдан ўтказилган пишлоқ творог билан аралаштирилади. Пишлоқнинг бир қисми қолдирилади. Кўкатлар тўғраб олинади.
2. Кўкатлар творогли аралашмага солинади. Барча ингредиентлар яхшилаб аралаштирилади. Агар пишлоқ шўр бўлса, туз солмаслик мумкин.
3. Тухум, кефир ва сметана аралаштирилади.
4. Лаваш хамири таъбга кўра 3-4 қатлам бўлиши мумкин. Қолипга дастлаб тухумли аралашма қуйилади, сўнгра лаваш хамири қўйилиб, устидан творогли начинка солинади.
5. Ҳар бир қатлам шу тарзда тайёрланади ва пирогнинг энг юқори қисмига қирғичдан ўтказилган пишлоқ сепилади.
6. 180 даража ҳароратда 30 дақиқа давомида печда пишириб олинади.

Творогли запеканка

Творогли запеканка тайёрлаш кўп вақт талаб этмайди. Ушбу егуликни нафақат нонушта, балки байрам дастурхони учун ҳам тайёрлаш мумкин.

Керакли маҳсулотлар:

• творог — 1 килограмм;
• тухум — 6 дона;
• сариёғ — 30 грамм;
• шакар упаси — 150 грамм;
• маккажўхори крахмали — 1 ош қошиқ;
• манни ёрмаси — 1 ош қошиқ;
• ваниль — 1 ош қошиқ.

1. Творог элакдан ўтказилади. Унга ёғ миқдори камида 82 фоиз бўлган озгина сариёғ қўшилади ва блендерда яхшилаб аралаштирилади.
2. 6 та тухум сариғи чуқур идишга ажратиб олинади. Шакар упаси қўшилиб, миксер қилинади. Сўнгра оз-оздан творогли масса қўшилади ва яна миксер билан аралаштирилади.
3. Устидан манни ёрмаси ва маккажўхори крахмали қўшилади. Яхшилаб аралаштирилгач, бир неча дақиқага қолдирилади.
4. Ажратиб олинган тухум оқи миксер билан яхшилаб кўпиртирилади. Аста-секин тахминан 30-40 грамм шакар упаси қўшилади.
5. Кўпиртирилган тухум оқига творогли масса қўшилади ва аралаштирилади.
6. Қолипгаи пергамент қоғоз солинади, сўнгра ён томонлари ва пастки қисмига сариёғ суртилади. Ёғланган қолипга манний ёрмаси сепилади, шунда запеканкани ундан олиш осонроқ бўлади. Устидан тайёр масса солинади ва юзаси текисланади.
7. Запеканка 170 даража қиздирилган печда 50-60 дақиқа давомида пиширилади. Пишгандан сўнг дарҳол печдан олиб ташланмайди, бироз совишини кутиш лозим.

«Творогли конвертлар» печеньелари

Болаликни ёдга солувчи назали ширинликлар. Тайёрлаш учун ҳар қандай ёғли творог мос келади. Миқдорга қараб, рецептда асосий маҳсулотлар — ун, сариёғ, шакар ва тухум нисбати ўзгаради.

Керакли маҳсулотлар:

• творог — 250 грамм;
• сариёг — 100 грамм;
• ун — 170 гррамм;
• шакар — 3-4 ош қошиқ;
• туз — 1/2 чой қошиқ;
• истеъмол содаси — 1 ош қошиқ.

1. Барча маҳсулотлар хона ҳароратида бўлиши керак. Пиширишдан бир неча соат олдин творог ва сариёғ музлаткичдан олиб қўйилади. Пишириқлар юмшоқ ва мазали чиқши учун ёғ миқдори камида 5 фоиз бўлган творогдан фойдаланиш тавсия этилади.
2. Блендердан фойдаланиб творог бир ҳил майдаланади. Унга юмшоқ сариёғ қўшилади.
3. Творогли масса яна блендер билан яхшилаб аралаштирилади. Устидан ун, сода ва туз қўшилади. Қўлга ёпишмайдиган силлиқ хамир қорилади.
4. Хамир бир соатга музлаткичга қўйилади. Тайёр бўлгач, хамир юпқа қилиб ёйилади ва кичик доира шакллари кесиб олинади.
5. Ҳар бир доирани шакарга ботириб, шакар томони ичкарига қаратилиб иккига букланади ва яна шакарга ботириб олинади.
6. Печеньелар пергамент билан қопланган листга терилиб, уларни 200 даражада олдиндан қиздирилган печга қўйилади ва 20-25 дақиқа давомида пиширилади.

Творогли кекс рецепти

Оддий ҳамда мазали майиз қўшилган творогли кекс рецепти.

Керакли маҳсулотлар:

• ун — 150 грамм;
• ёғ — 75 грамм;
• шакар — 80 грамм;
• творог (18 фоизли) — 130 грамм;
• тухум — 2 дона.
• қабартма — 1 ош қошиқ;
• майиз — 80 грамм;
• ваниль — 1 ош қошиқ;
• шакар упаси.

1. Элакдан ўтказилган творог сариёғ билан аралаштирилади. Сўнгра яхшилаб миксер билан аралаштирилади.
2. Устидан шакар қўшилади ва яна миксер қилинади. Иккита тухум қўшилади ва  аралаштирилади.
3. Ушбу босқичда таъбга бироз ваниль, творогли аралашма қўшилади. Бир ҳил масса олиш учун миксер билан яна яхшилаб аралаштирилади.
4. Эланган ун қабартма билан аралаштирлади ва бошқа маҳсулотлар билан биргаликда бир идишга солинади.
5. Яхшилаб ювиб қуритилган майиз хамирга қўшилади.
6. Тайёр бўлган хамир қолипга қуйилади. 180 даража печда 50-55 дақиқа давомида пиширилади.
7. Кекс тайёр бўлгач, юзасига шакар упаси сепилади.

Творогли булочкалар

Творогли булочкаларни пишириш учун кўп вақт кетмайди. Уларни нонуштада бир пиёла чой ёки қаҳва билан истеъмол қилиш мумкин.

Керакли маҳсулотлар:

• тухум — 2 дона;
• шакар упаси — 3-4 ош қошиқ;
• творог — 250 грамм;
• сут — 2-3 ош қошиқ;
• ун — 350-400 грамм;
• қабартма — 1 ош қошиқ.

1. Тухум, туз ва шакар яхшилаб аралаштирилади.
2. Аралашмага творог қўшилади, устидан сут қўшилиб, бир ҳил массага эга бўлиш учун ҳамма нарса яхшилаб аралаштирилади.
3. Эланган ун билан қабартма қўшилади, творогли аралашмага қўшиб, юмшоқ хамир қорилади.
4. Хамир кичик қисмларга ажратилиб, ёйиб чиқилади. Ичига начинка сифатида шоколад, майиз ёки бошқа мевалар қўшиш мумкин.
5. Творогли булочкалар пергамент қоғоз солинган листга жойлаштирилади. Бундан ташқари, булочкалар ёпишмаслиги учун ўсимлик мойи билан ёғланади.
6. Булочкалар устига бироз шакар сепиш ҳамда тухум сариғини суртиш мумкин.
7. 180 даражада қиздирилган печда 15-20 дақиқа давомида пиширилади.