Чирчиқ шаҳрида жойлашган «Махам-Чирчиқ» АЖ корхонаси ишлаб чиқариш цехининг синтез колоннасида 4 октябрь куни соат 08:30 ларда портлаш содир бўлганди. ФВВ ҳолат юзасидан қўшимча маълумот берди.
Унда айтилишича, бош вазир ўринбосари Жўрабек Мирзамаҳмудов, Фавқулодда вазиятлар вазири Абдулла Қўлдошев, Ички ишлар вазирининг биринчи ўринбосари Шуҳратжон Собиров, Тошкент вилояти ва Чирчиқ шаҳар ҳокимликлари, мутасадди вазирлик ва идораларнинг масъул раҳбарлари ҳамда ходимлари томонидан зудлик билан воқеа жойига чиққан ҳолда чақнаш оқибатларини бартараф этиш ишлари ташкил этилди.
Чақнаш оқибатида икки нафар ишчи-ходим енгил турдаги тан жароҳати олган ва уларнинг бири шаҳар шифохонасига ётқизилган. Чақнаш оқибатида келиб чиққан ёнғин соат 10:00 да тўлиқ бартараф қилинди.
Чақнаш сабабларини ўрганиш ҳамда келгусида бундай ҳолатларнинг такрорланишига йўл қўймаслик юзасидан зарур чора-тадбирларни белгилаш мақсадида, Вазирлар Маҳкамасининг тегишли қарори билан бош вазири ўринбосари Жўрабек Мирзамаҳмудов раҳбарлигида ҳукумат комиссияси тузилиб, белгиланган ўрганиш ишлари олиб борилмоқда.
«Ўзкимёсаноат» эълон қилган ахборотга кўра, «Махам-Чирчиқ» АЖнинг Аммиак-1 ишлаб чиқариш цехи синтез бўлинмасида қисқа портлаш юз бериши оқибатида цехнинг синтез калоннасида ёнғин келиб чиққанди. Ҳодиса оқибатида корхонанинг бошқа ишлаб чиқариш майдонлари ҳамда аҳоли яшаш пунктларига зарар етмаган. Шу билан бирга атроф муҳитга зарарли газлар тарқалмаган. Бу бўйича барча хавфсизлик чоралари ўз вақтида кўрилган.
Вилоят ҳокимлиги ҳодисанинг сабаб ва оқибатларини атрофлича баҳолаш мутахассислар томонидан алоҳида текширувни талаб қилиши туфайли кейинроқ батафсил ахборот берилишини маълум қилганди.
Изоҳ (0)