Тошкент шаҳар ҳокимлиги томонидан аҳоли фаровонлигини аниқлаш юзасидан сўровнома ўтказилди. Бу ҳақда ҳокимлик ахборот хизмати хабар берди.
Қайд этилишича, сўровда шаҳарнинг 12 туманидан турли ёшдаги 1 минг 606 нафар эркак ва аёллар иштирок этган. Хусусан, қатнашчиларнинг 43,2 фоизи оилавий моддий аҳволи ўртача эканини билдирган. Респондентларнинг 38,9 фоизи моддий аҳволи пастлигини, 14,6 фоизи моддий аҳволи жуда паст эканини айтган.
Туманлар кесимида Яккасарой, Шайхонтоҳур, Мирзо Улуғбек ва Олмазор туманларидаги респондентларнинг аксарияти молиявий аҳволини ўртача, деб баҳолайди. Яккасарой туманидаги респондентларнинг катта қисми моддий аҳволини юқори деб баҳоласа, Янгиҳаёт, Чилонзор, Сергели ва Бектемир туманлари аҳолисининг аксарияти моддий аҳволи даражаси пастлигини қайд этган.
«Респондентлар даромадларида барқарорлик кузатилмоқда: уларнинг деярли ярми молиявий аҳволи ўтган йилга нисбатан ўзгармаган деб ҳисоблайди. Респондентларнинг атиги 10,5 фоизи у ёмонлашганини қайд этган. Шу билан бирга, уларнинг 33,7 фоизи молиявий аҳволи бир йилдан кейин яхшиланади, 40,7 фоизи эса молиявий аҳволи ҳозиргидек қолади, деб ҳисоблайди.
Респондентлар ижтимоий мавқейи юзасидан ҳам қизиқарли ҳолатни кузатиш мумкин. Уларнинг 44 фоизи ўзини «ўрта» синф, 42,3 фоизи ўрта синфдан паст деб ҳисоблайди. Респондентларнинг 1,4 фоизи ўзини бой, 12,4 фоизи эса камбағал деган фикрда. Қизиғи шундаки, иштирокчиларнинг даромад даражаси ўзларини «ўрта» қатлам сифатида кўрсатишда ҳал қилувчи омил эмас. Даромад даражаси 1-3 миллион сўм ва 10 миллион сўмдан ортиқ бўлган респондентлар ўзларини тенг даражада «ўрта» табақага киритишлари мумкин», – дейилади ҳисоботда.
Бандлик бўйича 10 миллион сўмдан ортиқ даромаднинг энг юқори даражаси ахборот технологиялари, савдо, транспорт/логистика, хизмат кўрсатиш ва давлат ташкилотлари соҳаларида банд бўлган мутахассисларда аниқланган. Респондентларнинг 54,9 фоизи даромад даражаси ва эҳтиёжларини қондириш имкониятидан қисман мамнун. Сўровнома иштирокчиларининг 31,4 фоизи ўз даромадларидан мутлақо норозилигини билдирган. Қатнашчиларнинг 5,3 фоизи ўз даромадларидан тўлиқ қониқиш ҳосил қилган.
Респондентларнинг 15 фоизи ўзи учун маблағ жамғариш имкониятига эга. Қолган 77,5 фоиз респондентлар учун эса бундай имконият мавжуд эмас.
«Уй-жой шароитидан қониқиш даражасини ўртача деб аташ мумкин, чунки сўров иштирокчиларининг 40,7 фоизи «мамнун», 31,4 фоизи «мамнун эмас»– дейилади ахборотда.
Изоҳ (0)