Ўзбекистон ташқи ишлар вазири Владимир Норов 4 октябрь куни Венгрия Ташқи ишлар ва савдо вазири Петер Сийярто билан амалий учрашув ўтказди.
ТИВ матбуот хизматининг хабар беришича, вазирлар Шавкат Мирзиёевнинг Венгрияга расмий ташрифи доирасидаги музокаралар дастури ва кун тартибини атрофлича муҳокама қилди, икки давлат ўртасидаги муносабатларнинг бугунги ҳолати ҳамда ҳамкорликни ривожлантириш истиқболларини кўриб чиқди.
Ўзбекистон-Венгрия муносабатлари 2021 йилда стратегик шериклик даражасига кўтарилганидан кейин ушбу олий даражадаги ташриф икки мамлакат ўртасидаги фаол ва кенг қамровли мулоқотнинг, етакчилар ўртасидаги дўстона ва ишончли муносабатларнинг мантиқий давоми эканлиги қайд этилди.
Вазирлар ташқи ишлар вазирликлари ўртасидаги икки томонлама сиёсий маслаҳатлашувларни мунтазам равишда давом эттириш, 2023 йилгача бўлган вазирликлараро ҳамкорлик дастурини сифатли мазмун билан бойитиш муҳимлиги тўғрисида келишиб олди.
Шунингдек, автомобилсозлик, фармацевтика, қурилиш, қишлоқ хўжалиги, туризм ва томонларни қизиқтирган бошқа соҳаларда қўшма лойиҳаларни амалга ошириш орқали иқтисодий дипломатияни фаол ривожлантириш муҳимлиги таъкидланди.
Вазирлар парламентлараро мулоқотни фаоллаштириш, таълим соҳасидаги алоқаларни, жумладан, Stipendium Hungaricum дастури асосида мустаҳкамлаш бўйича таклифларни кўриб чиқди.
Халқаро ва минтақавий ташкилотлар, хусусан, БМТ, ЕХҲТ ва ТДТ доирасидаги ҳамкорликни чуқурлаштиришга алоҳида эътибор қаратилди.
Венгрия томони Ўзбекистон ва Европа Иттифоқи ўртасида кенгайтирилган шериклик ва ҳамкорлик тўғрисидаги янгиланган битимни тез фурсатларда имзоланишида қўллаб-қувватлашга тайёрлигини тасдиқлади.
Мулоқот чоғида халқаро ва минтақавий сиёсатнинг айрим жиҳатлари, хусусан, Афғонистондаги бугунги вазият юзасидан ҳам фикр алмашилган.
Изоҳ (0)