КХДР 4 октябрь куни эрталаб Японияга қарата баллистик ракета учирди, у Хоккайдо префектураси устидан учиб ўтиб, Тинч океанига қулади. Бу ҳақда NHK хабар бермоқда. Шундан кейин Япония ҳукумати ҳаво тревогасини эълон қилиб, осмондан ракета бўлаклари тушиши эҳтимоли ҳақида огоҳлантирди. Сўнгги марта КХДР ракетаси Япония ҳудудидан учиб ўтиши 5 йил аввал содир бўлганди.
КХДР томонидан учирилган ракета кузатувлар тарихида биринчи марта 4600 км масофани босиб ўтган. Бу ҳақда Япония мудофаа вазири Ясукадзу Хамада брифинг чоғида маълум қилди.
«Шимолий Корея томонидан учирилган баллистик ракета ўрта ёки ундан кўпроқ масофали баллистик ракеталар синфига тааллуқли. Бундан ташқари, шу нарса маълум бўлдики, парвознинг тахминий узунлиги, учиш нуқтасидан қулаш нуқтасигача бўлган масофа қарийб 4600 километрни ташкил қилган, бу уни тарихдаги энг узоқ парвозга айлантиради», — деди вазир.
Айни вақтда, Жанубий Корея Штаб бошлиқлари бирлашган қўмитаси маълумотларига кўра, Шимолий Корея ракетаси тахминан 4500 км масофани босиб ўтиб, 970 км баландликкача чиққан ва тезлиги эса 17 Махга етган, бу товуш тезлигидан 17 марта катта демакдир.
КХДР томонидан учирилган ракета сўнгги икки ҳафта ичидаги бешинчиси бўлди. Охирги марта Пхеньян 1 октябрь куни иккита кичик масофали баллистик ракета учирганди. Уларнинг иккаласи ҳам Япония иқтисодий зонасидан ташқарига, КХДР шарқий соҳиллари яқинига қулаган.
Изоҳ (0)