Республика валюта биржасида илк бор валютавий фьючерс контрактлари билан олди-сотди операцияларини амалга ошириш имконияти яратилди. Бу ҳақда Марказий банк «Дарё»га ахборот берди.
Маълум қилинишича, мазкур янгилик Марказий банк ва Республика валюта биржаси билан ҳамкорлигида ўтказилган тақдимотда эълон қилинган.
«Валютавий фьючерс контракти – маълум бир миқдордаги валютани (базавий актив) битим тузилган кундаги келишилган нарх бўйича келгусида аниқ бир кунда сотиш ёки сотиб олиш шартномасидир. Валютавий фьючерс контрактларининг жорий этилиши ўз навбатида валюта бозорда янги турдаги инструментларнинг пайдо бўлишига ҳамда бу орқали корхоналарнинг молиявий ҳолатига салбий таъсир кўрсатиши мумкин бўлган ташқи шоклар таъсирини юмшатишга имконият яратади», – дейилади манба хабарида.
Тадбир давомида валютавий фьючерс контрактлари, уни жорий этишдаги аҳамиятли жиҳатлар ва биржа савдолари иштирокчиларига янада қулайликлар яратиш мақсадида янги «UZCE mobile GB» мобил иловаси ишга туширилгани айтилган. Маълум қилинишича, янги мобил иловани жорий этишидан асосий мақсад:
- трейдерларга Республика валюта биржасидан ва иш жойидан ташқарида давлат қимматли қоғозларини сотиш ва сотиб олишда масофавий иштирок этиш имкониятини бериш;
- давлат қимматли қоғозлари бозорига оид биржа маълумотлари ва янгиликларидан хабардор бўлиш имконини яратиш;
- давлат қимматли қоғозлари савдо жараёнларини янада фаоллаштиришдан иборат.
Изоҳ (0)