Испаниянинг Каталония ҳудуди Жирона провинциясида содир бўлган портлаш оқибатида камида 18 киши, жумладан, ўн нафар бола жароҳат олди. Ҳодиса маҳаллий университет томонидан илмий тажриба ўтказилаётган пайтда содир бўлди, деб хабар бермоқда El Pais газетаси.
Маҳаллий университет ходими томошабинлар олдида эксперимент ўтказган, уни кўришга 300 га яқин одам йиғилган. Синовларнинг моҳияти суюқ азот ва иссиқ сувни битта бочкага солганда нима бўлишини кўрсатиш эди. Тажрибада икки нафар олим иштирок этган, бири суюқликни қуйган, иккинчиси металл барабанларни ушлаб турган. Биринчи олим сув ва азотни идишларга қуя бошлаганида, портлаш содир бўлган.
Айнан нима юз бергани ҳақида ҳозирча аниқ маълумот берилмаган. Ҳалок бўлганлар йўқ, бироқ экспериментчилардан бири жиддий жароҳат олган. Айрим томошабинлар ҳам жароҳатланган, уларнинг барчаси касалхонага ётқизилган.
Изоҳ (0)