Германия мудофаа вазири Кристина Ламбрехтнинг айтишича, Украинанинг НАТОга қўшилиш ҳақидаги сўрови Шимолий Атлантика альянсининг барча аъзолари билан муҳокама қилинади.
«Украина унда ўзини эркин ҳис қиладиган иттифоқни ўзи танлайди. Ушбу сўров мамнуният билан қабул қилинмоқда. Бироқ мазкур масала бўйича 30 та давлат овоз бериши керак, бу биргина Германиянинг қарори эмас. Украинадаги вазиятни ҳам ҳисобга олиш керак», — деди Ламбрехт Кишинёвда молдовалик ҳамкасби Анатолий Носатий билан қўшма брифинг чоғида.
Украина президенти Владимир Зеленский мамлакат ҳудудларининг Россия томонидан аннексия қилиниши фонида тезлаштирилган тартибда НАТОга аъзо бўлиш учун ариза топширди. Унинг сўзларига кўра, Киев ва НАТО аллақачон «де-факто иттифоқчилар», аммо бу мақом ҳужжатлаштирилиши керак. Жараён давомида Украина ўзи учун хавфсизлик кафолатлари бўйича музокаралар олиб бориш ниятида.
НАТО бош котиби Йенс Столтенберг Украинанинг альянсга қўшилиш ҳақидаги аризасига изоҳ берар экан, НАТОга аъзолик тўғрисидаги қарор 30 давлатнинг барчаси томонидан қабул қилиниши кераклигини, ҳозирда альянс Украинага Россиянинг шафқатсиз босқинидан ўзини ҳимоя қилиш учун тезкор ёрдам беришга эътибор қаратаётганини айтди.
Оқ уй жараённи бошқа вақтда муҳокама қилиш керак, деб ҳисобламоқда.
Изоҳ (0)