Наманган, Сурхондарё, Самарқанд, Тошкент вилоятларида кредит маблағларини талон-тарож қилиш ҳолатлари аниқланди. Бу ҳақда Иқтисодий жиноятларга қарши курашиш департаменти хабар қилди.
Қайд этилишича, Бош прокуратура ҳузуридаги департаментнинг Янги Наманган туман бўлими томонидан терговга қадар текширув ўтказилган. Унда А.Д. МЧЖ раҳбари А.Қ. ва бошқалар ҳудудий тижорат банки масъул ходимлари ўзаро тил бириктириб, ушбу МЧЖга чемодан маҳсулотларини ишлаб чиқариш учун ажратилган 1,5 миллиард сўм кредит маблағини расмий ҳужжатларни сохталаштириш йўли билан талон-торож қилгани аниқланган.
Департаментнинг Термиз туман бўлими томонидан ўтказилган терговга қадар текширувда маълум бўлишича эса, А.Н. МЧЖ раҳбари Н.А. 2019 йилда «Янги ҳаёт» МФЙ ҳудудидаги дам олиш масканини замонавий типда қайта таъмирлаш ва меҳмонхона қурилиши учун тижорат банки филиалидан 1,2 миллиард сўм кредит ажратилишига эришган. Ҳозирги кунга қадар қурилиш ва лойиҳа ишларини амалга оширмасдан, кредит маблағларини ўзлаштириш йўли билан талон-торож қилгани аниқланган.
Денов туман бўлими томонидан ўтказилган терговга қадар текширувда А.Ф. МЧЖ раҳбари А.Ф. ушланган. У тижорат банки филиалидан ажратилган 90 минг доллардаги кредит эвазига қўшни Қозоғистондан олиб келинган 495 бош чорва молларини сотиб юбориб, жуда кўп миқдордаги кредит маблағини ўзлаштириш йўли билан талон-торож қилган.
Шунингдек, департаментнинг Пискент туман бўлими томонидан терговга қадар текширув ўтказилган. Унда ҳудуддаги тижорат банки филиалининг масъул шахслари ва Б.Т. МЧЖ норасмий раҳбари У.Б. автомобилларга техник хизмат кўрсатиш шохобчасини ташкил этиш учун ажратилган 546,6 миллион сўм кредит маблағини нақдлаштириб олишиб, ўзлаштириш йўли билан талон-торож қилгани аниқланган.
Департаментнинг Оқдарё туман бўлими томонидан ўтказилган терговга қадар текширувда, «Э.Ш.» ва «Н.Ж.» оилавий корхоналари масъул шахслари ҳудудий тижорат банки филиалидан ажратилган 490 миллион сўм кредит эвазига нон ва ширинлик маҳсулотлари ишлаб чиқарувчи ускуналари сотиб олишиб, кейинчалик уларни қайта сотиб юбориш орқали кредит маблағларини ўзлаштириш йўли билан талон-тарож қилгани аниқланган.
Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)