2022 йилнинг январь—август ойларида Ўзбекистонга импорт қилинган озиқ-овқат маҳсулотлари ҳажми 2,16 млрд долларни ташкил этди. Бу ҳақда Давлат статистика қўмитаси хабар бермоқда.
Озиқ-овқат импорти ўтган йилнинг мос даврига нисбатан 36,1 фоизга ёки 574,7 млн долларга ошди.
2021 йилнинг январь–август ойларида жами импорт таркибида озиқ-овқат маҳсулотларининг улуши 10 фоизни ташкил этган бўлса, 2022 йилнинг январь–август ойларида бу кўрсаткич 1,2 фоизга кўпайиб, 11,2 фоиз бўлди.
2022 йилнинг январь—август ойларида 106 мамлакатдан озиқ-овқат маҳсулотлари импорти амалга оширилган.
Ўзбекистонга озиқ-овқат маҳсулотлари импортида юқори улушга эга давлатлар:
- Қозоғистон — 36,7 фоиз;
- Россия — 23,9;
- Бразилия — 14,3 фоиз;
- Беларусь — 4,4 фоиз;
- Покистон — 2,5 фоиз.
Ўзбекистон йил бошидан бери энг кўп буғдой сотиб олган — 465 млн долларлик. Ўтган йили бу кўрсаткич 390 млн долларни ташкил қилган эди.
Иккинчи ўринда 298 млн доллар билан шакарқамиш қайд этилган. Ушбу маҳсулотнинг деярли барчаси Бразилиядан келтирилади.
2021 йилнинг илк 8 ойига нисбатан маргарин маҳсулотлари импорти қарийб 5 баробарга ошди ва 6-ўриндан учинчи ўринга кўтарилди. Январь—август ойларида 188 млн долларлик маргарин сотиб олинган.
Бундан ташқари олма импорти деярли 5 баробарга кўпайиб, 10,4 млн долларни ташкил қилган. Июнь ойидан бери атиги 200 минг доллар атрофида олма импорт қилинган.
Йирик шохли қорамол гўшти, банан ва арпа импорти ҳам икки баробарга ошган.
Изоҳ (0)