Президентнинг 27 сентябрдаги «Оролбўйи ҳавзасида сув ресурсларини иқлим ўзгаришига мос ҳолда бошқариш лойиҳасини Осиё тараққиёт банки иштирокида амалга ошириш чора-тадбирлари тўғрисида»ги қарори қабул қилинди.
Ўзбекистон ва Осиё тараққиёт банки ўртасида 24 июнда имзоланган битимга мувофиқ 25 йил муддатга, шу жумладан 5 йиллик имтиёзли давр билан 150 миллион доллар миқдорида қарз ажратилиши назарда тутилган.
Лойиҳанинг умумий қиймати 194,9 миллион долларни ташкил этади, шу жумладан Ўзбекистоннинг ҳиссаси 40,2 миллион доллар эквивалентида, шундан 26,6 миллион доллар республика бюджети ҳисобидан ҚҚСни қоплаб бериш ва божхона божидан озод этиш шаклида бўлади.
Осиё тараққиёт жамғармасидан 3 миллион доллар, Осиё тараққиёт банкининг Юқори технологиялар жамғармасидан 0,3 миллион доллар ажратилади, фермер хўжаликлари улуши эса 1,38 миллион долларни ташкил қилади.
Лойиҳани амалга ошириш даврида (2022—2029 йиллар) «вақтинча олиб кириш» божхона режимига расмийлаштирилган махсус техникалар, механизмлар ва технологик ускуналар божхона божлари ва солиқ тўловларидан шартли озод этилади.
Лойиҳа Қорақалпоғистон Республикаси, Бухоро, Сурхондарё ва Хоразм вилоятларида амалга оширилади.
Сув хўжалиги вазирлиги лойиҳани амалга ошириш, қарз ва грант маблағларидан мақсадли ҳамда самарали фойдаланиш, шунингдек, барча мақсадли кўрсаткичларига эришилишини таъминлаш юзасидан масъул ижро этувчи орган ҳисобланади. Лойиҳани бошқариш ва мувофиқлаштириш функциялари Сув хўжалиги вазирлиги ҳузуридаги Сув хўжалигида хорижий инвестиция лойиҳаларини амалга ошириш марказига юкланади.
Осиё тараққиёт банкининг қарзини сўндириш, шунингдек, фоиз, қарз бўйича комиссия ва бошқа тўловлар билан боғлиқ харажатлар Ўзбекистоннинг бюджети ҳисобидан амалга оширилади.
Изоҳ (0)