Қашқадарё вилоятининг Косон туманидаги «Қуйи оброн» маҳалласида яшовчи 38 ёшли аёл ва «Юқори оброн» маҳалласида истиқомат қилувчи 19 ёшли қиз ўзини поезд тагига ташлаб, жонига қасд қилди. Бу ҳақда «Дарё»га журналист Муроджон Амиров хабар берди.
Маълум бўлишича, 38 ёшли аёл билан боғлиқ воқеа 27 сентябрь куни, 19 ёшли қиз воқеаси эса 25 сентябрь куни содир бўлган.
Журналист билан мулоқот қилган «Қуйи оброн» маҳалласи раиси Олия Болтаеванинг айтишича, 38 ёшли аёл воқеаси 27 сентябрь куни тонг саҳар, қуёш чиқиши арафасида рўй берган.
Аниқланишича, марҳума Қарши давлат университетида таҳсил олган ва шу кунгача ишсиз юрган. Яқинда тадбиркорлик фаолиятини бошлаш учун банкдан 30 миллион сўмлик чорва кредити олиб, таъминотчи орқали бир неча бош қўчқор сотиб олган. 23 сентябрь куни эса маҳалла хотин-қизлар фаоли Зиёда Ботирова таъминотчи билан биргаликда марҳуманинг уйига бориб у билан суҳбат ўтказган.
Бу оилани аввалдан яхши биламан. Оилада шу пайтгача ҳеч қандай можароли вазият кузатилмаган. Маҳалладаги намунали оилалардан бири эди. Воқеадан кейин қизи билан боғланганимда, эрталаб турганимизда онам жойида йўқ экан. Кейин мана шу хабарни эшитдик деб жавоб берди», — дейди МФЙ раиси Олия Болтаева.
Косон туманининг «Юқори оброн» маҳалласида яшовчи 19 ёшли қиз ҳам поезд тагига ташлаб, ўз жонига қасд қилган.
2003 йилда туғилган Г.У. билан боғлиқ воқеа 2022 йилнинг 25 сентябрь куни содир бўлган.
Воқеа тафсилотларини ўрганишни мақсад қилган журналист Муроджон Амиров 26 сентябрь куни кечки пайт соат 20:00 да «Юқори оброн» маҳалласи раиси Яхшимурод Худойбердиев билан телефон орқали мулоқот қилган. Мулоқот давомида раис айни пайтда шифохонада эканини, воқеадан хабари йўқлигини айтган.
Журналист билан мулоқот қилган маҳалладаги ёшлар етакчиси Шаҳло Каримова эса воқеа ҳақида журналистга ахборот берган.
Маҳалладаги хотин-қизлар фаоли Клара Рўзиева қизнинг оиласи ва ўзи ҳақида шундай дейди: «Оиласи яхши эди. Бирон бир жанжал кузатилмаган. Қизнинг ўзи ҳам яхши қиз эди. Онаси билан суҳбатлашдим ҳеч нарса бўлгани йўқ экан. Балки яшираётган бўлиши мумкин. Қўшни маҳалла «Ўрта оброн»да унаштирилган йигити бор экан. У билан суҳбатлашдим. У ҳам яхши эди гаплашиб тургандим, яқинда фотиҳа тўй қилмоқчи эдик деб жавоб берди».
Журналист марҳума Г.У.нинг оиласидаги қайғули аҳволни инобатга олиб, қизнинг унаштирилган йигити билан ҳам суҳбат қилиш учун «Ўрта оброн» маҳалласида бўлган. Маҳалла раиси Қаҳрамон Абдуллаев бу ҳақда суриштирган журналистга «мен сенга маълумот бермайман», дея қўпол муомалада бўлган. Шунингдек, журналистга дўқ қилиб, хонасидан чиқиб кетишини талаб қилган.
«Бизнинг вақтимизни оляпсан, сен кимсан ўзи, чиқиб кет хонамдан», — дея журналистга ҳурматсизлик қилган.«Дарё» маҳалла раисига қўнғироқ қилиб, журналистга қилинган қўпол муомала сабабини сўради.
Мен тўғри келган одамга ахборот бермайман. Бу маҳалла сири ҳисобланади. Менинг олдимга келиб, ахборот олмоқчи бўлган журналист буйруғини ҳам олиб келиши керак. Мен шундагина унга ахборот бераман» — дейди «Ўрта оброн» МФЙ раиси Қаҳрамон Абдуллаев.
Қаҳрамон Абдуллаевнинг «Дарё»га тушунтиришича, давлат сирларини ошкор этмаслик тақиқланганидек, у ҳам маҳалла сирини ошкор этмайди.
Мазкур ҳолатлар бўйича Транспорт прокуратураси ҳозирча расмий ахборот бермаган.
«Дарё» воқеалар ривожини кузатишда давом этади.
Изоҳ (0)