Ўзбекистон Савдо-саноат палатаси ва Малайзия Миллий савдо-саноат палатаси (National Chamber of Commerce and Industry of Malaysia – NCCIM) ўртасида ҳамкорлик меморандумини имзолаш маросими онлайн шаклда ташкил этилди, деб хабар бермоқда «Дунё» ахборот агентлиги.
Тадбир 2022 йил август ойида Ўзбекистоннинг иқтисодий салоҳиятини ошириш, миллий ўзбек маҳсулотларининг Малайзия бозорига экспорт ҳажмини кўпайтириш ва диверсификация қилиш, шунингдек, икки томонлама савдо-иқтисодий алоқаларни ривожлантириш мақсадида элчихона томонидан Малайзия Миллий савдо-саноат палатаси билан эришилган келишувларнинг мантиқий давоми бўлди.
Ҳужжатни имзолаш маросимида Ўзбекистон Савдо-саноат палатаси раиси ўринбосари Жаҳонгир Мамажонов ва Малайзия Миллий савдо-саноат палатаси президенти Со Тян Лаи бошчилигидаги ташкилотнинг 5 та мустақил палаталари президентлари иштирок этди.
Ўзбекистонда олиб борилаётган ижтимоий-иқтисодий ислоҳотларни эътироф этган ҳолда жорий йил 15–16 сентябрь кунлари мамлакатингиз раислигида бўлиб ўтган ШҲТнинг 22-саммити юқори савияда ташкил этилганини эътироф этиш керак, — деди NCCIM президенти Со Тян Лаи. Малайзия томони идоралар ўртасида имзоланадиган ҳамкорлик меморандуми икки ташкилот ўртасидаги алоқаларни янги босқичга олиб чиқишига, икки давлат ишбилармон доиралари вакилларини ўзаро манфаатли ҳамкорлигига хизмат қилишига ишонч билдиради.
Ўзбекистон Савдо-саноат палатаси раисининг ўринбосари Жаҳонгир Мамажонов ушбу меморандум Ўзбекистон билан Малайзия ўртасидаги савдо-иқтисодий, сармоявий, илмий-техникавий соҳалардаги ҳамкорликни изчил ривожлантиришда муҳим аҳамият касб этишини айтди.
Томонлар ўртасида меморандум имзоланиб, икки ташкилот раҳбарларининг Ўзбекистон ва Малайзияга амалий сафарларини уюштириш, Малайзия ҳудудида ўзбек миллий маҳсулотлари кўргазмаси ва бизнес-форумини ўтказиш, шунингдек, икки давлат ишбилармон доиралари вакилларининг ҳар икки мамлакат ҳудудида бўлиб ўтадиган турли тадбирларда иштирок этишини таъминлаш бўйича келишувга эришилди.
Изоҳ (0)