«Ўтов», «Тўқликка шўхлик-2» каби фильмлардаги роли орқали танилган актриса Замира Бешимова ярим йил олдин инсультни бошдан кечиргани, бу касаллик фарзандларига таъсир қилгани ва касалликдан сўнг қўрқув пайдо бўлгани ҳақида гапирди.
Актриса инсультни бошдан кечиргани, икки кун комада бўлгани ва бутун ҳаётини таҳлил қилгани тўғрисида
«Ўтган йили инсультни бошдан кечирдим. Бу нарсани касб касаллиги десам ҳам бўлади, кўплаб актёрларнинг қон босими ёки юраги билан боғлиқ муаммоси бор. Балки шу сабаб бўлгандир, кўпинча менга оғир саҳнали ролларни беришар эди. Кўзимни очсам, жонлантириш бўлимида ётибман. Икки кун комани бошдан кечирибман. Шу касалликдан кейин кўп нарсани таҳлил қилдим, ҳеч қаерда ишламадим.
Инсультдан кейин ўзимни бутунлай оиламга бағишладим, шунақа ҳолат бўлар экан, кўзингизни юмишга қўрқар экансиз ва бутунлай ҳаёт тўхтаб қолгандек туюлар экан. Ўлим ҳақ, у ҳамманинг бошида бор. Бироқ инсон тайёр бўлмас экан, эртага ўламан деган нарса бўлмас экан. Бутун ҳаётингиз кўзингиз олдидан ўтар экан, кичкина фарзандларим кўзимнинг олдидан ўтди. Кўп нарсани, шу нарса ҳақиқатан ҳам менга керакми, бу ерга боришим, шу ишни қилишим шартми, деб таҳлил қилишни бошладим.
Йўқотганларим тобора камайишига ҳаракат қилишни бошладим, ҳозирги кунда мен учун энг қимматли бойлигим — фарзандларим. Кўпинча ота-оналар фарзанди билан алоқани йўқотиб қўяди. Фарзанд кўчага чиқиб кетади, ота-она карьера қиламан деб ўртадаги ришта узилиб қолади. Шу нарсани йўқотиб қўймасликка ҳаракат қиляпман», — дейди Замира Бешимова.
Замира Бешимова инсульт бўлгани фарзандларига ёмон таъсир қилгани ва ўша пайтда нимадан қўрққани ҳақида
Кўчада юрганимда, машиналар кўп жойдан ўтаётган вақтим кўзимнинг олдига эҳтиёт бўл, сени уйда тўртта боланг кутяпти деган нарса келади. Ҳозир ўйлайдиган нарсам шу бўлиб қолган. Менга нимадир бўлса, болаларимнинг аҳволи қандай кечади деб ўйлайман. Биламан, барибир кўчада қолиб кетишмайди, қарайдиган, боқадиган одам бўлади, бироқ онанинг ўрнини ҳеч ким босолмайди. Эртага уларнинг бошига тушади, нима қилади деган нарса одамни ўйлантиради. Бу томондан одам ўзи учун қўрқмас экан, икки кун комада бўлдим, ҳеч нарсани эслай олмайман. Менга укол қилишган, кийимларимни алмаштиришган.
Инсоннинг ҳаёти ўтиб кетади, худди телевизорни ўчириб қўйгандек гап экан. Сиз учун ҳеч нарса ўзгармайди, орқангиздан қоладиган инсонларнинг ҳаётини ўзгартириши мумкин экан. Инсульт бўлганимда кичкина фарзандим икки ёшга тўлмаган эди, унинг кўзларини, болаларимнинг атрофимда қандай гирдикапалак бўлганини кўрдим ва биринчи навбатда шуларга керак эканман деб ўйладим. Катта ўғлим 12 ёшда, орадан ярим йил ўтди, ҳаттоки ҳозиргача ойи, мазангиз яхшими, ойи чарчамадингизми, деб сўрайди ёки сал кайфиятим ўзгарса ҳам, кўзимга тикилиб туради. Касал бўлишим уларга ёмон таъсир қилди», — дейди актриса.
Мавзуга доир:
Изоҳ (0)