Ўзбекистонда ҳафта охиригача нисбатан совуқ об-ҳаво бўлади

Ўзбекистон шимолий ҳудудларига 26 сентябрь, душанба кунидан Волга бўйидан совуқ антициклон кириб келади, деб хабар бермоқда «Ўзгидромет».

Қайд этилишича, сешанбадан ҳаво массасининг кириб келиши республиканинг барча ҳудудларига тарқалади ва ҳафта охиригача Ўзбекистон ҳудуди нисбатан совуқ антициклон периферияси таъсири остида бўлади.

27 сентябрдан бошлаб республиканинг барча ҳудудлари бўйича ҳаво совуқлашади, кундузги ҳарорат 22-27 даражагача пасаяди. 29—30 сентябрда кечалари ҳарорат пасаяди, кечаси ва эрталаб 10-15 даражагача пасаяди.

26—27 сентябрь кунлари фронт ўтишида баъзи жойларда шамол чанг-тўзонлар билан 15-20 метр/секундгача кучайиши кутилмоқда. Жанубнинг энг чеккасида ва Фарғона водийсида шамолнинг кучайиши 21-23 метр/секундга етиши мумкин.

Республиканинг текислик ҳудудларида ёғингарчилик кутилмайди, фақат 27 сентябрь куни тоғолди ва тоғли ҳудудларда баъзи жойларда бироз ёмғир ёғади.