Тошкент вилоятида 1 гектар ерни 400 минг долларга сотмоқчи бўлганлар қўлга олинди

Тошкент вилоятининг Янгийўл туманида ер олди-сотдиси билан боғлиқ жиноят аниқланди, деб хабар бермоқда Бош прокуратура матбуот хизмати.

Маълум қилинишича, фуқаро С.Х.нинг Тошкент вилояти ИИББ ЖҚБга қилган мурожаатига асосан вилоят прокуратураси ҳамда ИИВ ЖҚББ КваИЖҚКБ билан ҳамкорликда тезкор тадбир ўтказилди.

Ўтказилган тезкор тадбирда С.Х. ўзининг жиноий шериклари билан биргаликда 2019 йилда Янгийўл туман ҳокимлиги томонидан фуқаро М.Б.нинг номига тенг шерикчилик асосида «Ёшлар меҳнат гузари ишлаб чиқариш цехлари» мажмуасини қуриш учун Янгийўл тумани «Чортоқ» маҳалласи ҳудудидан ажратилган 2 гектар ер майдонидан 1 гектарини С.Х.га 400 минг доллар эвазига сотишга келишиб, ундан ўзаро келишилган пулларнинг 30 минг долларини фирибгарлик йўли билан олаётган вақтида ашёвий далиллар билан ушланган.

Мазкур ҳолат юзасидан Янгийўл туман прокуратураси томонидан Жиноят кодексининг 168-моддаси 4-қисми «а» банди ва бошқа моддалар билан жиноят иши қўзғатилиб, дастлабки тергов ҳаракатлари олиб борилмоқда.

Мавзуга доир:

• Тошкент вилоятида бир гуруҳ шахслар 4,5 гектар ерни 240 минг долларга сотмоқчи бўлгани аниқланди
• Сирдарёда дарё қирғоғидаги 4,5 гектар ерни 240 минг долларга сотишга уринган шахслар ушланди