Сречко Катанец Ўзбекистон терма жамоаси билан кетма-кет 7 та ғалаба қайд этди. Бу борада фақат икки мураббий ундан олдинда

Ўзбекистон миллий терма жамоаси Жанубий Кореяда ўтган халқаро ўртоқлик ўйини доирасида Камерунни мағлубиятга учратди (2:0).

Сречко Катанец қўл остидаги жамоа кетма-кет еттинчи ғалабасини қўлга киритди. Словениялик мутахассис Ўзбекистон терма жамоаси бу натижага эришган учинчи мураббий бўлди, дея хабар қилмоқда Алишер Никимбаев.

Ундан аввал Рустам Акрамов (1994 йил) ва Самвел Бабаян (2015-2016) мазкур кўрсаткични қайд эта олган — улар қаторасига 8 та ўйинда ғалаба қозонган.

Камерун Ўзбекистон терма жамоасига қарши ўйнаган 60-терма жамоага айланди. Шунингдек, Ўзбекистон еттинчи марта Африка минтақаси вакили билан куч синашди.

Бундан аввал «оқ бўрилар» Нигерия, Буркина-Фасо, Сенегал, Марокаш, Жанубий Судан ва Уганда билан ўйин ўтказганди.