Srechko Katanes O‘zbekiston terma jamoasi bilan ketma-ket 7 ta g‘alaba qayd etdi. Bu borada faqat ikki murabbiy undan oldinda

O‘zbekiston milliy terma jamoasi Janubiy Koreyada o‘tgan xalqaro o‘rtoqlik o‘yini doirasida Kamerunni mag‘lubiyatga uchratdi (2:0).

Srechko Katanes qo‘l ostidagi jamoa ketma-ket yettinchi g‘alabasini qo‘lga kiritdi. Sloveniyalik mutaxassis O‘zbekiston terma jamoasi bu natijaga erishgan uchinchi murabbiy bo‘ldi, deya xabar qilmoqda Alisher Nikimbayev.

Undan avval Rustam Akramov (1994-yil) va Samvel Babayan (2015-2016) mazkur ko‘rsatkichni qayd eta olgan — ular qatorasiga 8 ta o‘yinda g‘alaba qozongan.

Kamerun O‘zbekiston terma jamoasiga qarshi o‘ynagan 60-terma jamoaga aylandi. Shuningdek, O‘zbekiston yettinchi marta Afrika mintaqasi vakili bilan kuch sinashdi.

Bundan avval “oq bo‘rilar” Nigeriya, Burkina-Faso, Senegal, Marokash, Janubiy Sudan va Uganda bilan o‘yin o‘tkazgandi.