19 сентябрь куни Нью-Йоркда Ўзбекистон ташқи ишлар вазири Владимир Норов Бирлашган Миллатлар Ташкилоти бош котибининг ўринбосари, БМТнинг аксилтеррор бошқармаси бошлиғи Владимир Воронков билан учрашув ўтказди. Бу ҳақда ТИВ ахборот хизмати хабар берди.
Қайд этилишича, суҳбат давомида томонлар сўнгги йилларда Ўзбекистон Республикасининг БМТ ва унинг тузилмалари билан ҳамкорлиги амалий мазмун билан бойигани ҳамда сифат жиҳатидан янги босқичга кўтарилганини таъкидлаган.
Турли соҳаларда, шу жумладан, БМТнинг Марказий Осиёда глобал терроризмга қарши стратегиясини амалга ошириш бўйича Қўшма ҳаракатлар режаси ва Икки томонлама ҳамкорлик бўйича «йўл харитаси» доирасида алоқаларни мустаҳкамлаш имкониятлари мавжудлиги таъкидланган.
Воронков мамлакатда амалга оширилаётган ислоҳотларни, республиканинг халқаро ва минтақавий ҳамкорликни кенгайтириш борасидаги саъй-ҳаракатларини юқори баҳолаган. Ўзбекистон Республикасининг Шанхай ҳамкорлик ташкилотидаги муваффақиятли раислиги ва яқинда Самарқанд шаҳрида бўлиб ўтган ташкилот саммитининг салмоқли натижалар билан якунлангани эътироф этилган.
Ўзбекистоннинг минтақада ва мамлакатда тинчлик ва барқарорликни таъминлаш, экстремизм ва терроризмга қарши кураши, бағрикенглик, динлараро ва маданиятлараро мулоқотни ривожлантириш, ёшлар бўйича самарали сиёсатини амалга ошириш, можароли ҳудудлардан аёллар ва болаларни қайтариш ва уларни жамиятига интеграциялашувини таъминлашдаги ютуқлари қайд этилган.
Изоҳ (0)