Футбол ўйини доим жуда кескин ўтади.
...Тезроқ, ошир, — бир ўйинчи қичқиради.
— Давом эт, олдинга, — иккинчиси далда беради.
Нимаси ажабланарли дейсизми? Ҳар қандай футбол турнири – бу ҳис-туйғулар ва эҳтиросларнинг жўшқин намунаси. Лекин бу оддий ўйин эмас: бу «Мустақиллик кубоги» учун Ўзбекистонда илк марта бўлиб ўтаётган ногирон-ампутантлар ўртасидаги футбол чемпионати.
Жасорат қоидалари
Майдондаги футболчилар қўлтиқтаёқларига суяниб тўпни бир оёғи билан тепади. Ногирон-ампутантлар ўйини одатдагидан фарқ қилади. Биринчидан, футбол майдонининг ўлчами. У стандартдан кичикроқ — 60х40 м. Майдонда олти нафар футболчи, бир оёғи йўқ ёки ампутация қилинган, ҳар бири қўлтиқтаёқда, дарвозабон эса бир қўлсиз ёки туғма нуқсонга эга. Учрашув икки таймдан иборат бўлиб, танаффус билан ҳар бири 20 дақиқадан давом этади. Дарвозабоннинг ҳаракатлари дарвозабон майдони билан чегараланади. Қўлтиқ таёқ ёки оёқнинг ампутация қилинган қисми билан ўйнаш тақиқланади.
Бу йигитларнинг чидамлилиги ва матонатига ҳавас қилса арзийди. Бу ерда ҳар кимнинг ўз ҳикояси бор: кимдир бахтсиз ҳодисада бир оёқ-қўлини йўқотган, кимдир саратон туфайли, кимдир заводда станокда ишлаш натижасида. Ампутация нима? Бу ҳаётнинг олдин ва кейинги бўлиниб кетиши, бу янги ва кучли оғриқлар билан ўзини қабул қилиш учун ички кураш. Бу чексиз кураш. Айнан шу шароитда спорт руҳан синмаслик, кучли бўлишга туртки беради.
Ўзбекистонда 33 йилдан буён ногирон-ампутантлар футбол жамоаси мавжуд. Бу вақт ичида жамоа жаҳон чемпионатида беш карра энг яхсиси бўлган: 1990- (АҚШ), 1991 (Ўзбекистон), 2007 (Туркия), 2010 (Аргентина) ва 2012 йиллар (Россия). Миллий терма жамоа 1988 йилги Жаҳон чемпионатида кумуш, шунингдек, 2002 йилги Жаҳон чемпионатида бронза медалини қўлга киритган. Жорий йилнинг март ойида Ўзбекистон терма жамоаси I Осиё чемпионати саралаш босқичида иккинчи ўринни эгаллаб, Жаҳон чемпионатига йўлланма олди.
Бизнеснинг ижтимоий масъулияти
«Матонат футбол» ногирон-ампутантлар футболини ривожлантириш маркази томонидан Мустақиллик кубоги учун ногирон-ампутантлар ўртасида илк футбол чемпионати ўтказилмоқда. Бош ҳомий — InfinBank. Мусобақалар Бухорода ўтказилгани ҳам бежиз эмас: шаҳар азалдан ҳаётга илғор қарашлари билан машҳур бўлиб келган, қадимий тарихга эга. Бу сафар эса InfinBank бевосита иштирок этган яна бир тарих яратилди. Кўпчилик фикрича, фақат фойда кўришга «берилиб кетган» тижорат банки уч йилдан буён ногирон-ампутантлар футболини ривожлантириш марказига ёрдам бериб келмоқда.
Жорий йилда банк ва нодавлат нотижорат ташкилотлари ўртасидаги ҳамкорлик янги босқичга кўтарилди: Ўзбекистон тарихида илк бор «Мустақиллик кубоги» турнири ташкил этилди. Шунингдек, банк терма жамоага Туркияда бўлиб ўтадиган жаҳон чемпионатига йўлланмалар учун тўловларни амалга оширишда ҳам ёрдам берди. Албатта, хайрли ишлар овоза қилинмайди ва улар ҳақида гапириш ҳам одат тусига кирмайди, бироқ InfinBank ўз мисолида бизнес вакилларини мана шундай ҳар қандай қийинчиликларга қарамай, таслим бўлмай, олға интилиб, ғалаба қозонаётганларга кўмак беришда иштирок этишга ундайди.
«Мустақиллик кубоги» натижалари
Мусобақа муваффақиятли ўтди, дея баралла айта оламиз. Чемпионатда республикамиз вилоятларидан жами олтита жамоа иштирок этди. Финалда шу йилнинг октябрь ойида бўлиб ўтадиган Жаҳон чемпионатига йўл оладиган терма жамоа футболчиларининг кўргазмали футбол баҳси ўтказилди. Улар «Ўзбекистон №1» ва «Ўзбекистон №2» терма жамоаларига бўлинди. Ўйин 9:1 ҳисобида «Ўзбекистоннинг №1» жамоаси фойдасига ҳал бўлди.
Таъкидлаш жоизки, ўтказилган чемпионат шунчаки ўйин эмас. Бу қўл-оёқларини йўқотган, умидсизликка тушган одамларга ўзини жамиятнинг тўла ҳуқуқли аъзоси сифатида ҳис қилиш, таслим бўлмаслик ҳамда руҳан кучли бўлиб, ҳар қандай қийинчиликларни енгиб ўтиш ва муваффақиятга эришиш мумкинлигини кўрсатиш ва исботлаш имконини беради.
Реклама ҳуқуқи асосида.
Изоҳ (0)