Германия ҳукумати бензин, дизель ва авиация ёқилғиси етказиб беришни таъминлаш учун Россияга тегишли учта нефтни қайта ишлаш заводини назорат остига олди. Бу ҳақда CNN хабар бермоқда.
Германия Иқтисодиёт вазирлиги 16 сентябрда Россия нефть гиганти «Роснефть»нинг мамлакатдаги шўъба корхоналарини вақтинча ўз тасарруфига олганини эълон қилди.
Роснефть Deutschland ва RN Refining & Marketing Германия нефтни қайта ишлаш қувватининг қарийб 12 фоизини ташкил қилади. Бу ҳаракат энергия таъминоти хавфсизлигига бўлган таҳдидга қарши туриш учун ишлаб чиқилган, — дейилади вазирлик баёнотида.
Февраль ойи охирида Украинадаги уруш сабаб Европа ва Россия ўртасида энергетик зиддият юзага келди — минтақага нефть ва табиий газ импорти кескин камайди.
Германиянинг газ ва электр саноатини тартибга солувчи Федерал тармоқ агентлиги «Роснефть»нинг учта нефтни қайта ишлаш заводидаги улушларини назорат қилади: Берлин яқинидаги PCK Schwedt, Гейдельберг яқинидаги MiRo ва Бавариядаги Bayernoil.
Schwedt нефтни қайта ишлаш заводи Германиянинг энергия эҳтиёжлари учун алоҳида аҳамиятга эга бўлиб, кунига 220 минг баррель хом ашёни қайта ишлайди.
Reuters маълумотларига кўра, завод Берлинни қарийб 90 фоиз ёқилғиси билан таъминлаш учун жавобгардир.
Россия «Дружба» қувури орқали Schwedt нефтни қайта ишлаш заводига хом нефть етказиб беради. Германия иқтисодиёт вазирлиги муқобил экспорт йўлларини топишга ҳаракат қилмоқда.
Аввалроқ Германия ҳукумати учта йирик газ компаниясини миллийлаштирмоқчилиги ҳақида хабар берилганди.
Изоҳ (0)