Франциянинг асосий диққатга сазовор жойларидан бири — Версал саройи ва Лувр ҳукуматнинг қиш олдидан энергияни тежаш чора-тадбирлари доирасида кечки чироқларни эртароқ ўчиришни бошлайди. Бу ҳақда шанба куни France 2 телеканали эфирида Франция маданият вазири Рима Абдул-Малак маълум қилди.
Биз бугун кечки пайт эртароқ Лувр ёритгичини ўчиришни ўз тарафимиздан бошламоқчимиз. Пирамиданинг ёритилиши соат 01:00 ўрнига 23:00да ўчади. Шунингдек, Версал чироқлари келаси ҳафтадан бошлаб 23:00 ўрнига 22:00 да ўчади, — деди вазир.
Абдул-Малакнинг сўзларига кўра, бу Эйфель минораси чироқларини аввалроқ соат 01:00 ўрнига 23:45 да ўчириш қарори каби рамзий маънога эга бўлади.
Вазир, шунингдек, иситиш тизимларини янада замонавий ва тежамкор тизимларга алмаштириш муҳимлигига эътибор қаратди.
Париж мери Анн Ҳидалго сешанба куни энергияни тежаш режасини тақдим этди, у бошқа нарсалар қаторида 23 сентябрдан бошлаб музейлар ва шаҳар ҳокимиятларини ёритиш вақтини қисқартиради.
Бундан ташқари, Франция пойтахти расмийлари шаҳар муассасаларида ҳароратни кундузи 19 дан 18 даражагача, кечқурун ва дам олиш кунлари эса 12 даражагача туширишни буюрди.
Европа Иттифоқидаги энергетика инқирози июль ойи бошида, Россиядан Европа Иттифоқининг қатор мамлакатларига газ етказиб беришда биринчи узилишлар, жумладан, Россияга қарши жорий этилган санкциялар туфайли «Шимолий оқим» учун турбиналарга техник хизмат кўрсатиш билан боғлиқ муаммолар юзага келганида ёмонлашди.
Франциядаги профилактика ишлари туфайли 56 та ядро реакторининг ярмидан камроғи ишламоқда. Бу эса вазиятни янада ёмонлаштирмоқда.
Изоҳ (0)