Украинанинг Харьков вилоятида жойлашган, яқинда украин армияси томонидан озод этилган Изюм шаҳри чеккасидаги ўрмондан оммавий қабрлар топилди, деб ёзади Meduza. «Настояшчее время» телеканали воқеа жойидан олинган фотосуратларни эълон қилди.
Телеканал хабар қилишича, ушбу тасвирларни украиналик журналистлар тақдим этган. Суратларда хочларни кўриш мумкин, уларнинг кўпчилиги тахталарни синдириб ясалган. Баъзи хочларда ёзувлар — исм-шарифлар ва саналар бор. Хочлардан бирига «УҚК, 17 киши, Изюм ш., моргдан» деб ёзиб қўйилган. Қабрларнинг бир қисмига эса хочлар ўрнатилмаган.
Украинанинг алоҳида ҳолатларда бедарак йўқолган шахслар бўйича вакили Олег Котенко (у Изюмга бориб келган) тасвирларнинг ҳақиқийлигини тасдиқлаган. Телеканал эфирида у Украина томони шундай қабрлар борлигини билгани, бу ҳақда улар россиялик ҳарбийлар жойлаган видеолар орқали хабар топгани ва Изюм озод этилганидан сўнг уларни қидириб топганини маълум қилди.
Котенконинг сўзларига кўра, у жойда юзлаб қабрлар бор. Уларга нечи киши дафн этилган, улар ким ва қандай ҳолатларда ҳалок бўлган — булар ҳали аниқ эмас. Ҳалок бўлганлар орасида ҳарбийлар ҳам, оддий фуқаролар ҳам борлиги тахмин этилмоқда. Ўлим саналарига қараганда, тинч аҳолининг камида бир қисми Изюм Россия армияси томонидан ўққа тутилганида ҳалок бўлган, деди вакил.
Кейинроқ Харьков вилояти полициясининг тергов бошқармаси бошлиғи Сергей Болвинов Британиянинг Sky News телеканалига маълум қилишича, бу жойга 440 га яқин одам дафн этилган. «Айтишим мумкинки, бу ере нг катта оммавий қабрлардан бири… унда 440 дан ортиқ жасад бор. Битта жойга 440 киши дафн қилинган», — деди Болвинов. Унинг сўзларига кўра, баъзилар ўлдирилган, қолганлар артиллериядан ўққа тутиш чоғида ва авиазарбалар оқибатида ҳалок бўлган. Жасадларнинг барчаси Россиянинг ҳарбий жиноятларини тергов қилиш доирасида эксгумация қилинади, дея қўшиб қўйди Болвинов.
Изюм шаҳри апрель бошида Россия қўшинлари томонидан эгаллаб олинган эди. Украина Қуролли кучлари сентябрь бошида, Харьков вилоятидаги катта кўламли қарши ҳужум чоғида шаҳар устидан назоратни қайтариб олди. Изюм маъмурияти маълум қилишича, шаҳар учун жанглар ва истило чоғида камида минг нафар маҳаллий аҳоли ҳалок бўлган.
Баҳорда журналистлар сунъий йўлдошдан олинган тасвирларда Донецк вилоятининг Мариуполь шаҳри яқинида бир нечта оммавий қабрларни аниқлаган эди, ушбу шаҳар Россия армияси истилоси натижасида деярли вайрон бўлган. Украина ҳукумати ҳисоб-китобларига кўра, шаҳарда 20 мингдан ортиқ тинч аҳоли ҳалок бўлиб, биноларнинг 95 фоизи вайрон бўлган ёки зарар кўрган.
Изоҳ (0)