Арманистон Хавфсизлик кенгаши котиби Армен Григорян Озарбайжон билан тинчлик келишувига эришилгани ҳақида маълум қилди. Бироқ унинг сўзларига кўра, Боку билан имзолаш учун ҳозирча бирор ҳужжат ёки келишув тайёрланаётгани йўқ.
«Халқаро ҳамжамиятнинг иштироки туфайли 14 сентябрь соат 20:00 дан (Тошкент вақти билан 21:00) сулҳ бўйича келишувга эришилди. Умид қиламизки, Озарбайжон бу келишувга амал қилади», — деди давлат котиби Армен Григорян Жамоат телевидениеси эфирида.
14 сентябрь куни тушдан кейин Арманистон бош вазири Никол Пашинян парламентда мамлакат учун «мустаҳкам тинчлик ва хавфсизлик»ни кафолатлайдиган ҳужжатни имзолаш режаси ҳақида маълум қилганди. Шундан сўнг Ереванда норозилик намойишлари бошланди. Кейинроқ Пашинян унинг сўзлари нотўғри талқин қилингани ва шу пайтгача Боку билан ҳеч қандай ҳужжат имзоланмаганини айтди.
Эслатиб ўтамиз, 13 сентябрга ўтар кечаси Арманистон Мудофаа вазирлиги чегара ҳудуди Озарбайжон томонидан ўққа тутилгани ҳақида хабар берди. Боку бу воқеани Арманистон томонидан 12 сентябрда содир этилган отишмага жавоб деб атади. Томонлар расмий маълумотларига кўра, Арманистон—Озарбайжон чегарасидаги тўқнашувлар оқибатида икки кун ичида камида 150 киши ҳалок бўлган.
14 сентябрь оқшомида Озарбайжон ташқи ишлар вазири Жейҳун Байрамов Боку Ереванга ўт очишни тўхтатишни таклиф қилганини айтди. 15 сентябрь куни КХШТ вазиятни баҳолаш учун бош котиб бошчилигида эскалация зонасига ўз миссиясини юборади.
Изоҳ (1)
Ilohim tinchlik bo'lsin