Ўзбекистонда товар ва хизматлар миллий католигининг янгиланган версияси ишга туширилди

Ўзбекистонда товар ва хизматларнинг ягона электрон каталогининг янгиланган версияси ишга туширилди. Бу ҳақда Давлат солиқ қўмитаси хабар бермоқда. 

Янгиланган талқинда қуйидаги янги функциялар мавжуд:

• ҳар бир бўлими учун қулай қидирув тизими;
• товарлар ва хизматларга бириктирилган қатъий ва тавсия этилган ўлчов бирликларини кўриш;
• товар ва хизматларга бириктирилган имтиёзлар ID-рақами;
• маҳсулот (хизмат)лар кодининг бутун занжирини кўриш имконияти;
• каталог тузилмаси бўйича йиғма кўрсаткичлар.

Янги имкониятлардан фойдаланиш учун «tasnif.soliq.uz» сайти бош саҳифасининг «Электрон каталог» ойнасидаги «Жадвалда кўриш» тугмасини босиш лозим.

Маҳсулотлар ва хизматлар идентификация коди (МХИК) асосида маҳсулотларга штрих-код ва QR-кодни генерация қилиш учун яратилган техник имконият муҳим янгилик ҳисобланади. 

Бу хусусият келгусида МХИКга боғланган маҳсулотларнинг штрих-кодини (QR-код) сканерлаш орқали айланмадан олиб чиқишни сезиларли даражада соддалаштиради.

Шунингдек сайтда «Маҳсулот ҳақида батафсил маълумот» янги бўлими қўшилди. Унда маҳсулот (хусусиятлари, ишлаб чиқарувчиси ва бошқалар) ҳақидаги ҳамма фойдаланиши мумкин бўлган маълумотлар билан танишиш мумкин. Маҳсулот карточкалари босқичма-босқич тўлдириб борилади.